இன்டர்வெல் இல்லாத திரையரங்கம்

இன்டர்வெல் இல்லாத திரையரங்கம்

ஹீரோயின் மேக்கப்பை விஞ்சும்

வெண்திரையின் மூலைகளில் பச்சைப் பாசி

உடைந்த சீட்டுகளுக்கு நடுவே

எலிப் புழுக்கையின் வாசனை

கூரை ஓட்டை வழியே

மழைநீரின் நேரடி ஒளிபரப்பு

டிக்கெட் தேவையில்லை

நனைந்தபடி பார்க்கலாம்

சூன்யத்தில் மிதக்கும்

துருப்பிடித்த புரொஜெக்டர்

வெற்று ஹாலில் மவுனத்தில்

சுழலாத மின்விசிறியின் ஈனஸ்வரம்

வயிற்றுப்பசியில் கத்தும்

பறவைகளின் பிண்ணனி இசை

எல்லாவற்றையும் ரசித்தபடி

உடைந்து கிடக்கும் கட் அவுட்டில்

இன்னும் சிரித்துக் கொண்டிருக்கிறார்

வாழ்ந்து கெட்ட குடும்பத்தின் பிரஜையைப் போல

அந்தக் கால சூப்பர் ஸ்டார்

*****