அரிசி எந்தக் கடையில் விளைகிறது?
காளையரின்
வியர்வை சிந்தி
காளைகளின்
சாணமும் கோமியமும் விழ
ஏர்
உழுத நிலத்தை
டிராக்டர்
கார்பன் புகை உமிழ உழுகிறது
பெண்டிர்
பாட்டு பாடி நாற்று நட்ட வயல்களில்
இயந்திரங்கள்
கர கர சத்தத்தோடு நாற்று நடுகின்றன
களை
பறித்து கால்களால் அம்மி விட்டுச் செல்லும்
நிலங்களில்
களைக்கொல்லிகளின் வாடை வீசுகிறது
கதிர்
அறுத்து கட்டு கட்டி களத்து மேட்டில்
முத்துகளென
உதிரும் நெல்மணிகளை
இயந்திரம்
அறுத்துக் கொண்டு வந்து
டிரக்கில்
உமிழ்ந்து விட்டுப் போகிறது
வீட்டுக்கு
வந்து பத்தாயத்தில் நிரம்பி
அவிழ்த்து
ஆவாட்டி உணவாகும் நெல்
களத்து
மேட்டிலிருந்து வியாபாரியின் கைகளுக்கு மாறி
பளபள
அரிசிப் பைகளாகக் கடைகளில் வீற்றிருக்கிறது
அரிசி
எல்லா கடைகளிலும் விளைகிறது
*****
