ஞானத்தின் பாட்டு

ஞானத்தின் பாட்டு

அவசரப்பட முடியாது

நிதானமாகச் செல்ல வேண்டும்

பல நேரங்களில் பிடிபடிவதற்குப்

பொறுமையாகக் காத்திருக்க வேண்டும்

அதிகம் அடைய வேண்டும் என்று

ஆசை கொண்டு விட முடியாது

கிடைப்பது கொஞ்சமானாலும் அதில்

மகிழத் தெரிந்திருக்க வேண்டும்

எதிர்பார்க்கக் கூடாது என்பதல்ல

அது எவ்வளவு அளவோடு இருக்க வேண்டும் என்பதை

எப்போதும் புரிந்திருக்க வேண்டும்

கிடைக்கும் வெற்றிகளுக்காக மட்டுமல்லாது

தோல்விகள் கொண்டு வரும் அனுபவங்களுக்காகவும்

மகிழத் தெரிந்திருக்க வேண்டும்

சாதனைகளோ வேதனைகளோ

நம் கைகளில் கொஞ்சம் இருப்பது போக

நம் கைகளில் மட்டுமே எல்லாம் இல்லை என்கிற

தெளிவு எப்போதும் இருக்க வேண்டும்

நம்மளவில் நாம் முழுமையாக இருந்தாலும்

மொத்தத்தில் நாம் ஒரு பாகம் என்பதை மறந்து விடக் கூடாது

நாம் எதைக் கொண்டு வந்து சேர்ப்போம்

நம்மிடம் எது கொண்டு வந்து சேர்க்கப்படும் என்பது

எப்போதும் புதிரானது

எதற்காக நாம் எப்படி வினை புரிவோம் என்பது

நம்மால் அறிய முடியாது

அறிய வேண்டும் என்று பிரியப்படும் நாம்

காத்திருக்க வேண்டும்

ஒரு நாள் எல்லாம் தெரிய வரும்

நாம் அவ்வளவு துடித்திருக்க வேண்டாம் என்பது புரிய வரும்

காலத்தின் முன்னர் சென்று

இனி நாம் எதை மாற்ற முடியும்

வேறு வழி இல்லாத போது

நாம் நம் ஞானத்தை எல்லாருக்கும் அளிக்கலாம்

அதை எத்தனை பேர் எடுத்துக் கொள்வார்கள்

எத்தனை பேர் கண்டு கொள்ளாமல் இருப்பார்கள் என்பதல்ல

எடுத்துக் கொள்ள ஒருவர் நினைக்கும் போது

அது அங்கிருக்க வேண்டும்

அதைத் தவிர உங்கள் ஞானத்தால்

இந்த உலகை எதுவும் செய்ய முடியாது

அது பாட்டுக்கு இயங்கிக் கொண்டிருக்கும்

*****