பிரச்சனை இல்லாத ஒருவர்

பிரச்சனை இல்லாத ஒருவர்

கடன் என்றால் பயந்தார் அப்பா

கடன் வாங்க போட்டி போடுகிறான் மகன்

வங்கிகள் கடன் தருகின்றன

வட்டிக் கடைகள் கடன் தருகின்றன

ஏதேதோ பெயரில் உருவாகி வரும்

நிதி நிறுவனங்கள் கடன் தருகின்றன

மொபைல்களும் கடன் தருகின்றன

கடன் வாங்காமல் இருக்க முடியாது

கடனுக்குப் பயந்து ஒளிய முடியாது

எந்நேரமும் ஒலிக்கின்ற

அலைபேசியில் கடன் தந்தவர்களின் அழைப்புகள்

அலைபேசியை அணைத்துப் போட்டால்

அன்பிற்குரியவர்களின் எண்களுக்கு

ஆபாசச் செய்திகள் அனுப்பப்படுகின்றன

வேலை தேடுபவராக இருக்கலாம்

பண முடையில் இருப்பவராக இருக்கலாம்

சம்பாதிக்க ஆசைப்படுபவராக இருக்கலாம்

பணம் இல்லாமல் இருப்பது பிரச்சனையா

கடன் இல்லாமல் இருப்பது பிரச்சனையா

அலைபேசியில் சூனியக்காரர்கள் உலவும் உலகில்

கையில் அலைபேசி இல்லாத

பைத்தியக்காரர்கள் மட்டுமே பிரச்சனை இல்லாதவர்கள்

*****