ஒளி பெறும் நிழற்படம்

ஒளி பெறும் நிழற்படம்

விடிந்த பின்

இருட்டுக்கு வேறு நிறம்

அஸ்தமனத்திற்குப் பின்

வெளிச்சத்திற்கு வேறு நிறம்

இரு முனையிலும் தீ

நடுவில் தொங்கும்

நூல் ஏணி வாழ்க்கை

இரண்டு புறமும்

அணையும் போது

நடுவில் பற்றிக் கொள்ளும்

தீப்பொறி மரணம்

இரண்டு பக்கமும் இழுக்க

நடுவில் இழுபடும்

நரம்பாகும் ஆயுள்

விளக்கை ஏற்ற

கவிகிறது நிழல்

ஒளிபெறுகிறது

நீத்தார் புகைப்படம்

*****

இரவின் நிறம்

இரவின் நிறம்

வெளிச்சம் வேண்டுமெனக் கதறிய போது

இருள் வந்தது

இருளுக்குப் பழகிய பின்பு

வலிகள் வந்தன

வலிகளை ஏற்றுக் கொண்ட

ஒரு நாளில் சிரிப்பு பிறந்தது

இத்தனை நாளாய்

இந்தச் சிரிப்பே

நீ எங்கிருந்தாய் என்ற போது

வெளிச்சத்தைத் தேடி

இருளைத் தொலைத்த ஒவ்வொரு பொழுதிலும்

உன் நிழல் போல இருந்தேன் என்றது

அந்தச் சிரிப்பு

நிழலா என்ற போது

உன் மீது பட்ட

வெளிச்சத்தின் இரவு

என்றது சிரிப்பு

*****

தத்துவார்த்தமாக வாழ்தல்!

தத்துவார்த்தமாக வாழ்தல்!

நாயையோ பூனையையோ கண்டால்

அறவே பிடிக்காது அந்த இருவருக்கும்

அவ்வளவு பிடித்து

அப்படி வளர்த்த

மகனும் மகளும்

கைவிட்டுப் போன பிறகு

ஒரு பூனையை வளர்த்திருக்கலாம்

என்ற ஏக்கம்

அவர்களில் ஒருவருக்கு

வாக்கிங் போகையில்

கூடவே துணைக்கு வந்து திரும்பும்

தெருநாய்க்கு ஒரு ரொட்டியைப் போட்டிருக்கலாம்

என்ற குற்றவுணர்வு இன்னொருவருக்கு

என்ன இருந்தாலும்

பூனையையும் நாயையும் வளர்ப்பவர்கள்

அனாதைகளாவதில்லை என்று

அடிக்கடி தத்துவம் பேசிக் கொண்டிருக்கிறார்கள்

இப்போது கூட யாதொன்றையும்

வளர்க்கப் பிரியமில்லாத

அந்த இருவரும்

*****

ஏற்பின்மையின் தேடல்

ஏற்பின்மையின் தேடல்

உன்னை எங்கு எல்லாம் தேடுகிறேன்

முடிவில் களைத்துப் போகிறேன்

மீண்டும் தேடுகிறேன்

தேடிக் கொண்டே இருக்கிறேன்

நீ இல்லை

ஆனால் என் அருகில்தான் நீ இருக்கிறாய்

நான் தேடிக் கொண்டிருக்கும் நீயாக இல்லை

நான் தேடிக் கொண்டுதான் இருக்கிறேன்

நான் ஏன் என் தேடலை நிறுத்திக் கொண்டு

அருகில் இருக்கும் உன்னை

அப்படியே ஏற்றுக் கொள்ளக் கூடாது

இல்லாத ஒன்றை

இருக்கின்ற ஒன்றில் நான் ஏன் தேட வேண்டும்

*****

எரியும் ஆவணக் காடு

எரியும் ஆவணக் காடு

ஒரு போர்

நிறுத்தப் போவது யார்

ஒரு யுத்தம்

முடிவுக்குக் கொண்டு வரப் போவது யார்

அமைதிக்கான பரிசைப்

போட்டியிட்டு

வெல்லப் போவது யார்

சமாதானத்துக்கான விருதைச்

சண்டையிட்டு வெல்லப் போவது யார்

எல்லாம் வரலாற்றுக்குத் தெரியும்

அந்த வரலாறு எங்கே இருக்கிறது

காகிதங்களில்

அந்தக் காகிதங்கள் எங்கே இருக்கின்றன

ஏவுகணை வீச்சில்

எல்லாம் எரிந்து கொண்டிருக்கிறன

*****

மறதி கொண்டவன் நெஞ்சம் போல

எச்சரிக்கைப் பலகை

நாயொன்று

லோல்பட்டு லோன் போட்டு

வில்லங்கங்களை விலாசித் தள்ளி

அவஸ்தைப்பட்டு அப்ரூவ்டு மனை வாங்கி

வீடு கட்டி முன்னே ஒரு பலகை வைத்தது

“மனிதர்கள் ஜாக்கிரதை”

*****

கலியுக அன்னம்

பாலையும் தண்ணீரையும்

பிரித்துப் பருகும்

அன்னம்

இக்கலியுகம் வந்த பிறகு

பாக்கெட் பாலில்

பாலையும் ரசாயனத்தையும்

பிரித்துப் பருகிக் கொண்டிருக்கிறது

*****

மறதி கொண்டவன் நெஞ்சம் போல

பாஸ்வேர்ட் மறந்து

பர்கெட் பாஸ்வேர்ட் கொடுக்க

அது பாஸ்வேர்டை

இமெயிலுக்கு அனுப்ப

இமெயிலின் பாஸ்வேர்ட் மறந்தவன்

என்ன செய்வானோ

அதைத்தான் செய்கிறேன்

நான் செய்ய மறந்த வேலையை

உன்னிடம் சொல்லி

நீயும் மறந்து

அதே வேலை என்னிடம் வந்த போது!

*****