வளர்க நும் கவிதைக் கடை
இன்று ஒரு கவிதை இல்லாமல் போய்
விட்டதே
என்ன கொடுமை ஐயா
ஒரு கவிதை ஒரே ஒரு கவிதை
கூடுதலாகச் சுட்டால் குறைந்தா
போய் விடுவீர்
கவிதை வடை சுடும் கவிப்பித்தரே
ஒரே ஒரு கவிதை
கூடுதலாகப் போட்டுத் தந்தால்
குறைந்தா போய்விடுவீர்
கவிதைத் தேநீர் போடும் கவிக்கிறுக்கரே
ஒரே ஒரு தட்டுக் கவிதை
கூடுதலாகக் கொண்டு வந்து வைத்தால்
குறைந்தா போய் விடுவீர் உணவு
விடுதியின் கவிச்சேவகரே
என்ன நடக்கிறது என்பது தெரியாதா
எனக்கு
நிறைய கவி உணவுகள் மீந்து வீணாகி
விட்டதாகக்
குளிர்பதனப் பெட்டியில் வைத்து
மறுநாளுக்குத் தயார் செய்யும்
கவி முதலாளியே
அதிலொரு புழுத்த கவி வறுக்கியை
எடுத்து வீசக் கூடாதோ
இப்போது ஒரு கவிதை வடை மட்டும்
எலிக்காகப் பொறியில் காத்திருப்பது
தெரியாது என்றா நினைக்கிறீர்கள்
வாழ்க உங்கள் கவிதைப் பணி
வளர்க நும் கவிதைக் கடை
*****
