காகிதத்தின் அதிர்ஷ்டம்

காகிதத்தின் அதிர்ஷ்டம்

எல்லாருக்கும் ஆசை

விதவிதமான ஆசைகள்

வேகமாகச் சம்பாதிக்க வேண்டும்

விரைவில் பணக்காரராக வேண்டும்

காரில் செல்ல வேண்டும்

பிறகு விமானத்தில் செல்ல வேண்டும்

விண்வெளிக்குச் சுற்றுலா செல்ல வேண்டும்

எல்லாருக்கும் பணத்தின் மீது ஆசை

பணத்திற்கு யார் மீதும் ஆசையில்லை

பணத்திற்கு மட்டும் பணத்தின் மீது ஆசையில்லை

ஆசையிருந்தால் கறையான் அரிக்கும் பொழுதில்

கண்டு கொள்ளாமல் இருந்திருக்குமா

கிழிபட்ட போது கதறாமல் இருந்திருக்குமா

செல்லாது என அறிவித்த போது

சும்மா இருந்திருக்குமா

காலம் நேரம் லக்னம் ராசி பார்க்காமல்

கைமாறிக் கொண்டே இருக்குமா

பணமாக அச்சாகும் காகிதத்திற்கு அன்றோ

பணமாகும் அதிர்ஷ்டம் இருக்கிறது

*****