வாழ்க்கைப் புத்தகத்தின் நொடிப்பிழை

வாழ்க்கைப் புத்தகத்தின் நொடிப்பிழை

மறந்து போயிருந்த அந்த வார்த்தை

அந்த நேரத்தில்

நினைவுக்கு வராமல் போயிருக்கலாம்

கோடைக்கால நினைவுகளில்

வறண்டு போயிருந்த

கண்ணின் மழைக்காலத் துளி

அந்நேரம் விழாமல் இருந்திருக்கலாம்

டிஸ்ப்ளே போன செல்

அந்த நேரம் மட்டும் விழித்துக் கொண்டு

அக்காட்சியைக் காட்டாது இருந்திருக்கலாம்

எல்லாம் நிகழ்ந்தது அந்த ஒரு நொடி

ஒட்டுமொத்த வாழ்க்கையையும்

திருப்பிப் போடும்

அந்த ஒரு நொடி மட்டும்

இந்த வாழ்க்கையில் இல்லாதிருந்தால்

யாரும் யாரையும் பிரிந்திருக்க மாட்டார்கள்

தண்டவாளத்தில் ஓடும் வாழ்க்கை ரயில்

தடம்புரளும் என்பதை நம்பியிருக்க மாட்டார்கள்

அச்சடிக்கப்பட்ட புத்தகத்தில்

இனி பிழை திருத்த வழியில்லை என்பதைப் போல

ஒரு நொடிப் பிழையோடு

வாசிக்கப்படுவதாகிறது வாழ்க்கைப் புத்தகம்

*****