வீடு தேடி வரும் கடல்

அசந்தர்ப்பவெளி

ஒட்டிக் கொண்டு

கூடவே

வீடு வரும் வரை

கடலைப் பிரியும்

பிரிக்ஞையின்றியே

வந்து சேர்ந்த

மணல் துகள்

தட்டி விட்டு

டைல்ஸ் தரையில்

விழுந்த கணத்தில்

ஓவென்று கதறப் பார்க்கையில்

ஒளிபெற்றும் பிம்பத்தை உமிழும்

தொலைக்காட்சி

கடலலைச் சத்தத்துடன்

நீல வண்ண திரவப் பரப்பைக் காட்டி

மறுநொடியில் காட்சியை மாற்றி

மஞ்சள் வண்ண மணல் துகள் பரவிய

பாலைவனத்தில் யாருமற்ற பெருவெளியில் உறைகிறது

*****