மெய் அறிக்கைகள்

மெய் அறிக்கைகள்

இந்த வெயிலுக்கு

ஒரு மழை அடித்தால்  தேவலாம் என

கோடை மேகத்தின் காதுகளுக்கு

கேட்காது என்பது அறிந்தும்

வறண்ட உதடுகள் புலம்பும்.

இப்படி பெய்யுற மழைக்கு

ஒரு வெயில் அடித்தால் தேவலாம் என

டிசம்பர் வானின் காதுகளுக்கு

கேட்காது என்பது புரிந்தும்

ஈர உதடுகள் புலம்பும்.

இந்தக் கோடைக்கு

ஒரு குட நீரும்

இந்த மழைக்கு

ஒரு கேன் வாட்டர்

கிடைத்தால் போதும் என

அடைபட்ட ஆட்சியாளர்களின் காதுகளுக்கு

கேட்காது என்பது தெரிந்தும்

தவிக்கும் உதடுகள் புலம்பும்.

காதுகளின் கேட்காத தன்மையும்

வாய்களின் புலம்பும் தன்மையும்

இந்நூற்றாண்டின் மரபியல் புலம்புகள் என

அதைப் பின்தொடர்ந்து வரும்

மருத்துவ அறிக்கைகள் புலம்பும்.

*****