இருத்தல்

இருத்தல்

அத்தனை துளிகளால் நிறைந்திருந்தாலும்

கடலுக்கும் இருக்கிறது

ஒரு துளி தாகம்

வண்ணங்களால் நிரம்பியிருந்தாலும்

வானவில்லுக்கும் இருக்கிறது

வண்ணம் மீதான ஏக்கம்

அத்தனையும் சொல்லி முடித்த பிறகும்

புத்தரின் மௌனத்தில் எஞ்சி

உறைந்து நிற்கிறது ஒரு சொல்

எத்தனை நிறைத்தாலும்

நிரம்பாத இந்த வாழ்வில்

அரிசியும் சீனியும்

பொங்கலுக்குப் பரிசும்

கிடைக்கையில்

தேவதைகளுக்கும்

ஓர் ஆசை இருக்கத்தான் செய்கிறது

ஒரு குடும்ப அட்டை இருந்திருக்கலாம் என்று.

*****