உலகில் நிறுத்த முடியாத ஒரே போர்!

இப்போதெல்லாம் விசாரணை என்றதும் உங்களுக்கு மனதில் முதலில் தோன்றுவது என்ன?

உண்மை வெளிவருவதற்கு வாய்ப்பே இல்லை.

*****

தேர்தல் அரசியல் என்பது என்ன?

காந்தியும் கோட்ஸேயும் கூட்டணி வைத்துக் கொள்வதுதான்.

*****

மனைவியதிகாரம் என்பது என்ன தெரியுமா?

நேற்று ஒரு கல் உப்பு கூடுதலாக என்று சொன்னதற்கு, இன்று நான்கு கல் தூக்கலாகப் போடுவதுதான்.

*****

தங்கத்தின் சிறப்பு என்ன தெரியுமா?

ரூபாய் நோட்டுகளைச் செல்லாது என அறிவிக்க முடியும். தங்கத்தை அப்படி முடியாது.

*****

ச்சும்மா ஓட்டைப் பிரித்து மேய ஒரு வாக்குறுதி…?

மகளிருக்கு மாதந்தோறும் ஒரு கிராம் தங்கம்.

*****

வாக்கிங் போகிறவர்களின் எண்ணிக்கை பிரத்யேகமாகச் சமீப காலங்களில் அதிகரிக்க என்ன காரணம்?

மக்கள் வாக்கிங் போகும் இடங்களாகப் பார்த்து சுவையான பஜ்ஜி, போண்டா, சமோசா கடைகள் அமைவதுதான்.

*****

இந்தியர்களின் எந்த நம்பிக்கை உலகை அசரடிக்கிறது?

கொன்றால் பாவம் தின்றால் போய் விடும் என்பது போல, புண்ணியம் செய்தால் செய்த பாவம் பறந்தோடி விடும் என்ற நம்பிக்கைதான்.

*****

இன்றைய இந்தியனுக்கு என்னதான் பிரச்சனை?

அது இயக்குநர் ஷங்கரைக் கேட்க வேண்டிய கேள்வி சார்!

*****

ஸ்விஸ் பேங்க் எங்கே இருக்கிறது?

நாடாளுமன்ற தேர்தல் வருவதற்கு முன்பு எங்கிருந்ததோ, அங்கேதான் இப்போதும் இருக்கிறது.

*****

எந்தப் போரையும் அடாவடியாகப் புகுந்து நிறுத்த நினைக்கும் அமெரிக்க அதிபர் டொனால்ட் டிரம்பால் நிறுத்த முடியாத போர் எது தெரியுமா?

அவர் செய்யும் அக்கப்போர். அதை அவர் நினைத்தாலும் நிறுத்த முடியாது.

*****