கனவில் வரும் மிருகங்கள்

கனவில் வரும் மிருகங்கள்

கனவுக்குள் வந்து தெருநாய் எப்படி புகுந்து கொள்கிறதோ

ஓட ஓட விரட்டுகிறது

கால்கள் பசை போட்டு ஓட்டியது போலாகி விடுகிறது

சிங்கத்தை நேரில் பார்த்ததில்லை

கனவில் வந்து டிஸ்கவரி சேனலில் பார்ப்பது போல

பயமென்றால் பயம் அப்படி பயம் காட்டுகிறது

இந்தச் செய்தி சேனலுக்குத் தெரிந்தால்

பணம் வசூலிப்பார்களோ என்று

சிங்கத்தைப் பார்ப்பதை விட பயமாக இருக்கிறது

இதனாலே மிருகங்களை நேரில் பார்ப்பதில்லை

பார்க்காத போதே இப்படி மிரட்டல் என்றால்

பார்த்து விட்டால் உரிமை எடுத்துக் கொண்டு வந்து மிரட்டும்

ஊரிலும் மிருகங்கள் குறைந்து விட்டன

ஏழு நாய்கள் மூன்று பூனைகள்

கொஞ்சம் அணில்கள் இருக்கின்றன

எலிகளும் பெருச்சாளிகளும் இருப்பதாகச் சொல்கிறார்கள்

நல்லவேளை என் கண்களுக்குப் படுவதில்லை

கனவில் வந்து பயமுறுத்துவதும் இல்லை

ஆடுகளைப் பார்த்து நாளாகி விட்டது

கசாப்புக் கடைக்கு எங்கிருந்து கிடைக்கிறதோ

உரித்து தொங்க விட்டு வைத்திருக்கிறார்கள்

அப்படி தொங்க விட வேண்டும்

கனவில் வரும் மிருகங்களை என்று நினைப்பேன்

பாவம் அவைதான் என்ன செய்யும்

கனவில் கூட வரக் கூடாது என்றால்

அவை எங்குதான் வாழும் சொல்லுங்கள்

*****