நிர்வாண உலகில் கைபேசிகள் இல்லை

நிர்வாண உலகில் கைபேசிகள் இல்லை

ஓயாது அலறும் கைபேசிகள்

புது புது கட்டளைகளைப் பிறப்பித்தபடி இருக்கின்றன

காற்றில் யாரோ சொல்லும் மொழிக்கு

இங்கிருந்தே கட்டுப்பட வேண்டியதாயிருக்கிறது

கைபேசியை அணைத்து வைப்பது திமிர் எனப்படுவதால்

அணையாத தீபமென ஏற்றி வைக்க வேண்டியிருக்கிறது

தவற விடும் கைபேசியால் எண்களைத் தொலைத்து விடுவது

அக்கறையின்மை என விமர்சிக்கப்படுவதால்

அங்காங்கே எண்களைப் பலவிதமாக சேமிக்க வேண்டியிருக்கிறது

ஏதேதோ எண்களிலிருந்து அழைப்புகள் வரும் போது

தவறான அழைப்பு என்பதை

கீறல் விழுந்த இசைத்தட்டைப் போல சொல்ல வேண்டியிருக்கிறது

சைகை இல்லாத இடங்களுக்குச் சென்று விடும் போது

பிறந்து அழாது இருக்கும் குழந்தையைப் போலாகி விடும்

கைபேசியைக் காண்கையில் பேசுவதன் அங்கலாய்ப்புகளைக் கடந்து

யார் யார் அழைத்திருப்பார்களோ என்று தவிக்க வேண்டியிருக்கிறது

மனதுக்குள் சிப்பைப் போல பொருந்தி

ஓர் எந்திரம் போல இயங்க வைக்கையில்

கைபேசி கையிலிருப்பவருக்கு வீடுபேறு என்பதில்லை

நிர்வாணம் அடைபவரின் கைகளில் கைபேசி இல்லை

*****