கவர்ச்சியா, ஆளுமையா? – ஒரு டிரெய்லர் விசாரணை

கவர்ச்சியா, ஆளுமையா? – ஒரு டிரெய்லர் விசாரணை

மின்னும் வண்ண விளக்குகள், பின்னணியில் அதிரும் ராக் இசை, சுருட்டுப் புகைக்கு நடுவே ஸ்லோ மோஷனில் இறங்கும் கதாநாயகன். இதெல்லாம் வழக்கமான கேங்ஸ்டர் சினிமா பார்முலாதான். ஆனால், 'டாக்ஸிக்' டிரெய்லர் வெளியானதும் தமிழ் சினிமாவிலும் கன்னடச் சூழலிலும் கிளம்பிய புயல் இருக்கிறதே, அதுதான் தற்போது முழுவதும் கரையைக் கடக்க முடியாமல் சுற்றிக் கொண்டு இருக்கிறது.

டிரெய்லரைப் பார்த்த சமூக ஆர்வலர்கள் உடனே கொதித்தெழுந்து விட்டார்கள். "என்ன இது? பெண்களைப் போதைப்பொருளாகவும், ஆபாசப் பொருளாகவும் காட்டியிருக்கிறார்கள்!" என்பது அவர்கள் குற்றச்சாட்டு.

இன்னொரு பக்கம், "படத்தை இயக்கியதே கீது மோகன்தாஸ் என்கிற ஒரு பெண் இயக்குநர்தான்! ஒரு பெண் இயக்குநரே பெண்களைத் தவறாகக் காட்டுவாரா?" என்று படக்குழுவின் ஆதரவாளர்கள் எதிர் லாஜிக் பேசுகிறார்கள்.

இங்கேதான் சினிமா விமர்சனத்தின் ஆகப்பெரிய முரண் பிறக்கிறது.

ஒரு பெண் இயக்குநர் இயக்கிவிட்டார் என்பதற்காகவே அது பெண்ணியப் படைப்பாகி விடுமா? அல்லது, ஒரு பெண் கதாபாத்திரம் கையில் துப்பாக்கியைப் பிடித்துக்கொண்டு சிகரெட் பிடிப்பதால் மட்டுமே அது 'அதிகாரமிக்க பெண் கதாபாத்திரம்' ஆகிவிடுமா?

மேற்கத்திய சினிமாவில் ஆபத்தான வசீகரமான பெண் என்று ஒரு கான்செப்ட் உண்டு. ஆனால், அதை நம்மூர் மாஸ் மசாலா சூழலுக்குக் கொண்டுவரும் போது, கேமரா கோணங்கள் சட்டென்று மாறிவிடுகின்றன. கதாபாத்திரம் எவ்வளவு வலிமையானதாக இருந்தாலும், கேமரா என்னவோ அந்தப் பெண்ணின் ஆடைத் தேர்வையும், உடலமைப்பையும் மட்டுமே ஜூம் செய்து காட்டுகிறது. இது 'பெண் அதிகாரம்' என்பதா, அல்லது 'அதிகாரப்பூர்வக் கவர்ச்சி' என்பதா?

"நாங்கள் ஜென் இசட் தலைமுறைக்கான அழகியலை உருவாக்குகிறோம்" என்கிறார் கதாநாயகன் யாஷ். சரிதான், ஆனால் அந்த அழகியலில் பெண்களின் பங்களிப்பு என்பது நாயகனின் மாஸ் காட்சிகளுக்குப் பின்னணி அலங்காரமாக மட்டுமே இருக்க வேண்டும் என்பதுதான் விதியா?

ஒரு பெண்ணை வன்முறை உலகில் சக்திவாய்ந்த புள்ளியாகக் காட்டுவதற்கும், வன்முறையை அழகுபடுத்தும் இடத்தில் ஒரு பெண்ணை நங்கூரமாகப் பயன்படுத்துவதற்கும் நுட்பமான வித்தியாசம் உண்டு. 'டாக்ஸிக்' டிரெய்லரில் நிலவும் சர்ச்சை என்பது, இந்த இரண்டிற்கும் இடையே உள்ள மெல்லிய கோடு மங்கிப்போனதன் விளைவுதான்.

படம் முழுமையாக வெளிவந்த பிறகுதான், இதில் இருப்பது உண்மையான பெண் கதாபாத்திரங்களின் ஆளுமையா அல்லது வெறும் மார்க்கெட்டிங் தந்திரத்துக்கான கவர்ச்சிச் சித்தரிப்பா என்பது வெளிச்சத்திற்கு வரும். அதுவரை, இந்தத் 'டாக்ஸிக்' விவாதம் சமூக வலைதளங்களில் புகைந்துகொண்டுதான் இருக்கும்.

படம் வெளியே வந்தால் புயல் கரையைக் கடந்து விடும். அப்புறம் அடுத்து ஒரு புயலைக் கிளப்ப சினிமாக்காரர்கள் தயாராகி விடுவார்கள்.

*****