பிக் பாஸ் வீட்டின் செய்திக் குறிப்பு
அரசியல் பிக் பாஸ் வீட்டைப்
போல இருக்கிறது
யார் உள்ளே இருப்பார்கள்
யார் வேளியேறுவார்கள்
யார் யாரை வெளியேற்றுவார்கள்
யார் யார் யாரைத் தக்க வைத்துக்
கொள்வார்கள்
அன்றாடம் செய்திச் சேனல்களுக்கான
தலைப்புச் செய்திகள்
அந்த வீட்டிலிருந்து கசிகின்றன
நாளை என்ன நடக்கும் என்பதை
விவாத மேடைகள் தொகுத்து வழங்குகின்றன
ஒவ்வொரு அத்தியாயத்தின் பரபரப்பையும்
புலனாய்வு இதழ்கள் பொடி வைத்துக்
கூட்டுகின்றன
முடிவுகள் புஸ்வானங்கள் போல
இருந்தாலும்
ஒவ்வொரு தீபாவளியும் கொண்டாடப்பட
வேண்டியவை
கொண்டாட்டத்தின் உருவாகாத
குப்பைகள்
வேறெப்போது உருவாகப் போகிறது
சாலையில் கிடக்கும் குப்பைகள்
வீட்டினுள் நடந்த பரபரப்பை
வெளியில் காட்டுகின்றன
ஒரு நாள் பிக் பாஸ் வீட்டின்
குப்பைகள்
சாலைகளில் வீசப்படுகின்றன
ரத்தத் துளிகளும் சதைத் துணுக்குகளும்
எலும்புப் பிண்டங்களும் குப்பைகள்
கணக்கில் சேர்கின்றன
ஒரு பிக் பாஸ் வீட்டைக் கைப்பற்ற
முயலும் போது
உயிர்களும் குப்பைகளாக வெளியில்
வீசப்படலாம்
எது நடந்தாலும் விளம்பரங்கள்
பிரமாண்டமாகி விடுகின்றன
வீடு பூட்டப்பட்டாலும் தரைமட்டமானாலும்
கொளுத்தப்பட்டாலும் தகர்க்கப்பட்டாலும்
பரபர செய்திகள் பஞ்சாய் வெடித்துப்
பறக்கத் தொடங்குகின்றன
*****
நன்றி : ஆனந்த விகடன் (17.08.2022) இதழ்
No comments:
Post a Comment