ஒரு நாளின் காத்திருப்பு

ஒரு நாளின் காத்திருப்பு

சத்தமெழுப்பி வரும் வியாபாரிகள் குறைந்து விட்டார்கள்

உப்பே உப்பே என்று ஏகாரத்திலோ

மீனூ மீனூ என்று ஊகாரத்திலோ

புளீ புளீ என்று ஈகாரத்திலோ

கீரை கீரை என்று ஐகாரத்திலோ

கேட்கும் குரல்கள் நின்று விட்டன

தேவையான அளவு ஒலியெழுப்பும் வகையில்

பதிவு செய்யப்பட்ட குரல்கள் பொருத்தப்பட்ட

வாகனங்களில் வருபவர்கள் சன்னமான குரலில் பேசுகிறார்கள்

பேரத்தைத் துவக்குவதற்கு முன்னே

ஒரே விலைதான் என்று அடித்துப் பேசுகிறார்கள்

வாசல் முன் வந்தப் பொருளைத் தவற விட முடியாமலும்

கையிலிருக்கும் பணம் போதாமையாலும் ஒருத்தி

சத்தமெழுப்பியபடி வரும் வியாபாரிகள்

யாரேனும் வருவார்களா எனக் காத்திருக்க தொடங்குகிறாள்

தலைச்சுமையைப் பாந்தமாய் இறக்கி வைத்து

தாகத்துக்குத் தண்ணீரோ அல்லது

பசிக்கு வயிறுக்கு ஒரு வாய் டீயோ கேட்டபடி

இருக்குற காசைக் கொடு தாயீ என்று சொல்வோரின் வருகைக்காக

நாள் முழுவதும் காத்திருந்து ஏமாந்துப் போகிறாள்

*****