ஐந்து பெண் பிள்ளைகளின் தகப்பன்

ஐந்து பெண் பிள்ளைகளின் தகப்பன்

ஒரு ஆண் பிள்ளைக்கு ஆசைப்பட்டு

ஐந்து பெண் பிள்ளைகளைப்

பெற்றெடுக்க வைத்தார் அப்பா

அதற்கு மேலும் முயன்று பார்க்க ஆசைதான் அவருக்கு

தர்மாஸ்பத்திரியில் அறுவை சிகிச்சையை

அவரைக் கேட்காமலே

அம்மாவுக்கு முடித்து வைத்திருந்தார்கள்

ஐந்து பெண் பிள்ளைகளில் ஒன்றுக்காவது

ஆண் பிள்ளைப் பிறக்குமென்று

எதிர்பார்ப்பு இருந்தது அவருக்கு

ஐந்தும் இரண்டிரண்டு பெண் பிள்ளைகளைப்

பெற்றெடுத்துக் கொஞ்சக் கொடுத்த போது

தன் கண் முன்னே தன் வம்சத்தின்

கடைசி ஆணாக சாவதாக உருவகித்து

உருகிச் செத்துப் போனவரின் ஈமச் சடங்கிற்கு

ஐந்து பெண்களால் நடத்தப்படும்

முதியோர் இல்லத்திலிருந்து

அனைவரும் வந்திருந்தனர்.

*****