என் பெயர் எண்
யாரென்று கேட்டவரிடம் எண்ணைக்
கொடுத்தேன்
எண்ணை உள்ளீடு செய்து பார்த்தவர்
எண்ணுக்குரிய பெயரைக் குறிப்பிட்டு
நீங்கள்தானா என்றார்
தொடர்பு கொள்ள விரும்பிய
மற்றொருவர்
எண்ணைப் பெற்றுக் கொண்டு
பின்
பெயரைப் பெற்றுக் கொண்டார்
பொருட்கள் வாங்கும் கடைகளில்
எனக்கொரு எண் இருக்கிறது
எண்ணைச் சொன்னால் ஆயுள் முழுதும்
வாங்கிய பொருட்களின் பெயர்கள்
வந்து விடுகின்றன
வரி செலுத்துகையில்
பயணம் புரிகையில்
அவசர உதவி வேண்டுகையில்
எண்கள் இருக்கின்றன
அவ்வபோது மறந்து போகும் பெயர்
எண்களைத் தட்டுகையில் ஒளிர்கிறது
எல்லோரின் எழுத்தையும் எழுதும்
சித்திரகுப்தனின் பேரேட்டில்
எண்கள் மிளிர்கின்றன
தலையில் எழுத்தை எழுதும்
பிரம்மதேவர்
எழுதுவதற்கு முன்னர் எண்களை
முணுமுணுத்துக் கொள்கிறார்
*****
No comments:
Post a Comment