தாகத்தை உறிஞ்சிக் குடித்தல்

தாகத்தை உறிஞ்சிக் குடித்தல்

காகத்திற்குக் கிடைத்த

அந்த பாட்டிலின் அடியில்

கொஞ்சம் எஞ்சியிருந்தது தண்ணீர்

தண்ணீரை மேலெழும்ப

கூழாங்கற்களைப் போட முடியாத விரக்தியில்

பாட்டிலை உருட்டி விளையாடியது காகம்

சுள்ளென்று அடிக்க ஆரம்பித்த வெயிலில்

கொஞ்சம் கொஞ்சமாக ஆவியாகத் தொடங்கியது

பாட்டிலின் உள்ளிருந்த நீர்

அன்றொரு நாள் நரியிடம்

வடையைப் பறிகொடுத்த ஆற்றாமையோடு

தனக்கான தண்ணீரை உறிஞ்சும் சூரியனை

அண்ணாந்து பார்த்துக் கொண்டது காகம்

பாட்டிலின்தண்ணீரோடு காகத்தின் தாகத்தையும்

உறிஞ்சிக் குடித்துக் கொண்டிருந்தது சூரியன்

*****