மதிப்பு

மதிப்பு

அறுபது பவுன் நகை

ஆறு கிலோ வெள்ளி

அறுபத்து மூன்று கிலோ வெண்கலம்

ஆறு லட்சம் ரூபாய் கல்யாணச் செலவுக்கு

அனைத்து வகை எவர்சில்வர் பாத்திரங்கள்

டி.வி., வாஷிங் மெஷின், கிரைண்டர், மிக்ஸி,

கட்டில், மெத்தை, பீரோ, டைனிங் டேபிள் சீர் வரிசை

தட்டுமுட்டுச் சாமான்கள்

சகிதம் நாட்டுப் பெண்ணாய் வந்திறங்கி

இந்து வீட்டுக் குடித்தன அடிமையாய் வாக்கப்பட்டு

இருப்போர்க்கெல்லாம் வடித்துக் கொட்டி

பத்துப் பாத்திரம் தேய்த்து

புழக்கடையில் புழங்கி

படி தாண்டா பத்தினாய்ப் பழக்கப்பட்டு

கணவன் கால் தொழுதவளுக்கு

இப்போதுதான் வாய்ப்பு வந்திருக்கிறது

ஊருக்கு ஊராட்சி மன்றத் தலைவராய்

ஒரு ரப்பர் ஸ்டாம்பாகவேனும்

இந்த முறை பொம்பளை பிரசிடென்ட் என்பதால்.

*****