பதிவுகள்

பதிவுகள்

நண்பகல்

நடுரோடு

பெருங்கூட்டம்

கண்காணிப்புக் கேமிரா இல்லை என்பதை

உறுதிபடுத்திக் கொண்டு

ரத்தம் தெறிக்க

கொலை செய்கிறது ஒரு கும்பல்.

வேடிக்கைப் பார்த்தபடி

செல்போன் காமிராவில்

பட்டும் படாமலும்

பதிவு செய்து கொண்டு

பயந்தோடுகிறது சனக் கூட்டம்

பேஸ் புக்கிலும், வாட்ஸ் அப்பிலும் பதிந்து

தங்கள் ஹீரோயிசத்தைக்

காட்டிக் கொண்டால் போதுமென்று.

*****

கதறல்

செடி, கொடி, மரம், மூலிகை நிறைந்த

காடுகளை அழித்து

விளைநிலங்களாக ஆக்கிய போது

மான், புலி, முயல், சிங்கம் என

காட்டு விலங்குகள் கதறியது போல்தான்

நெல்லும், கொள்ளும், உளுந்தும், பயிரும்,

தினையும், வரகும் பயிரிட்ட

விளைநிலங்களை அழித்து

நகர், ரியல் எஸ்டேட், தனிமனை, அபார்ட்மென்ட் என

ப்ளாட் போடும் வயல்களைக் கண்டு கதறுகிறான்

உழுது பயிரிட்டதால் கடனாளியாகி விட்ட விவசாயி.

*****