நன்றி – ஒரு லாபகரமான தத்துவம்!

நன்றி – ஒரு லாபகரமான தத்துவம்!

உலகம் ஒரு பெரிய கூட்டுறவுச் சங்கம். ஆனால் இதில் உறுப்பினர்களாக இருக்கும் நமக்கு, மற்றவர்கள் நமக்காக உழைப்பது நம்முடைய பிறப்புரிமை என்கிற கர்வம் எப்போதும் உண்டு.

காலையில் எழுந்து பற்பசையை அமுக்கும்போது, அதன் பின்னால் எத்தனை பேரின் உழைப்பு இருக்கிறது என்று நாம் யோசிப்பதில்லை. அந்தப் பற்பசையைத் தயாரித்தவர், சோப்புக்கு மணம் சேர்த்தவர், நாம் உடுத்தியிருக்கும் சட்டையை நெய்தவர் என ஒரு பெரும் கூட்டமே நமக்காக வியர்வை சிந்தியிருக்கிறது.

நாம் என்னவோ அந்தச் சட்டையை நாமே நெய்தது போலவும், சோப்பை நாமே கண்டுபிடித்தது போலவும் ஒரு மிதப்பில் அலைகிறோம்.

உண்மையில், முகம் தெரியாத மனிதர்களின் கருணையில்தான் நம் காலைக்கடன் முதல் இரவுத் தூக்கம் வரை எல்லாம் ஓடிக்கொண்டிருக்கிறது.

சாப்பிடும் முன் சிலர் கடவுளைக் கும்பிடுகிறார்கள். அது பிரியாணி பிரமாதம் என்று சொல்வதற்காக மட்டுமல்ல. உலகில் பலருக்குத் தட்டே கிடைக்காதபோது, எனக்கு அதில் சோறும் போட்டாயே, என்று நன்றி சொல்வதற்காக.

நன்றி உணர்வு என்பது வெறும் பண்பு அல்ல. அது ஒரு தற்காப்புக் கலை. உதவி செய்தவரிடம் நன்றி என்று சொல்லிப் பாருங்கள், அவர் முகம் மலரும். அந்த மலர்ச்சியில் உங்கள் அகங்காரம் கொஞ்சம் கருகும். அதுதான் முக்கியம்.

நன்றிக்கு இலக்கணம் தேடினால் மகாபாரதக் கர்ணனிடம் போய் நிற்கலாம். தம்பிகள் பக்கம் நியாயம் இருந்தது, தர்மம் இருந்தது. ஆனால் துரியோதனனிடம் செஞ்சோற்றுக்கடன் இருந்தது.

தான் அழியப்போகிறோம் என்று தெரிந்தும், நண்பா, நீ போட்ட சோற்றுக்கு என் உயிரைத் தருகிறேன், என்று நின்றானே, அதுதான் நன்றியின் உச்சகட்ட நையாண்டி. துரோகத்தை விட நன்றியுணர்வு வலிமையானது என்பதை அவன் மரணம் நிரூபித்தது.

மனம் சோர்வாக இருக்கிறதா? ஒரு வெள்ளைத் தாளை எடுங்கள். உங்கள் வாழ்க்கையில் நடந்த நல்ல விஷயங்களைப் பட்டியலிடுங்கள்.

எனக்கு இந்த வேலை கிடைத்தது ஆச்சரியம், இந்த நண்பன் கிடைத்தது வரம், என்று எழுதிப் பார்த்தால், உங்கள் சோகம் காணாமல் போகும். ஏனென்றால், நம்மிடம் இல்லாததை நினைத்து வருந்துவதை விட, இருப்பதை நினைத்து நன்றி சொல்வது லாபகரமானது.

நன்றி ஒரு சிறந்த கரைப்பான். உங்களை எப்போதும் நோகடிப்பவர் கூட, ஒரு காலத்தில் ஒரு சிறு உதவி செய்திருப்பார். அந்தக் கடுகளவு உதவியை மலையளவாக நினைத்துப் பாருங்கள்; உங்கள் கோபம் ஐஸ் கட்டியாய் கரையும்.

நன்றியுணர்வு என்பது ஒரு பிரபஞ்ச ரகசியம். நீங்கள் எவ்வளவுக்கு எவ்வளவு நன்றி சொல்கிறீர்களோ, அவ்வளவுக்கு அவ்வளவு பிரபஞ்சம் உங்களுக்குப் பரிசுகளை அள்ளித் தரும். இது ஒரு முதலீடு போன்றது.

தினமும் காலையில் இந்த உயிரைத் தக்க வைத்ததற்கு நன்றி, என்று ஆரம்பித்து, இரவு தூங்கும் முன் இன்று தப்பித்தோம் என்று முடிக்கும் வரை நன்றியுணர்வுடன் இருங்கள். மன அழுத்தம் குறையும், மகிழ்ச்சி கூடும்.

யார் கண்டது? நீங்கள் சொல்லும் ஒரு நன்றி, உங்களை ஒரு மனிதனாகக் கூட மாற்றலாம்! கொஞ்சம் ஓவராகத்தான் போகிறேனோ?!

*****