நடப்புக் கணக்கு

நடப்புக் கணக்கு

உங்கள் கணிப்புகள் தவறாகின்றன

என்று தெரிந்தும்

எப்போதாவது நிறுத்தி இருக்கிறீர்களா

யாரிடமிருந்து ஆர்வமும் வெறியும்

எப்போது எப்படி புறப்பட்டு வரும் என்று

யாருக்குத் தெரியும்

வரலாற்றில் கணிப்புகள் முறியடிக்கப்படுகின்றன

வரலாற்றைத் தர்க்க ஒழுங்கோடு

எழுத முற்படும் போது

எதிர்பார்ப்பவர்கள் எதிர்பாராததை

எதிர்கொள்ளும் போது

அதிர்ச்சிக்கு உள்ளாகிறார்கள்

அதிர்ச்சிகள் கணிப்புகளால் நேர்கின்றன

கணிப்புகளைத் தூர எறியுங்கள்

எதிர்பார்ப்புகளை எடுத்து வையுங்கள்

புதியதைப் புதியதாக எதிர்கொள்ளுங்கள்

அதை ஏன் பழையதாக எதிர்கொள்ள வேண்டும்

நினைக்கின்ற வேகத்தில்

விசயங்கள் நடக்காமல் இருக்கலாம்

ஏதோ ஒருவேகத்தில்

எல்லாம் நடந்து கொண்டு இருக்கின்றன

மெதுவாகவாவது

நடப்பது நடந்து கொண்டு இருக்கிறது

வேகத்தைக் காரணம் காட்டி

நடக்கவில்லை என்றோ

நடக்காது என்றோ எப்படிக் கூறுவது

*****