உடைபடும் வெளிச்சங்கள்

உடைபடும் வெளிச்சங்கள்

ரகசிய வாக்குறுதி

உடல் மேல் போர்த்தப்பட்டிருக்கிறது

உள்ளிருக்கும் ஆடைகளின் நிறங்கள்

அதனுள்ளிருக்கும் உள்ளாடைகளின் நிலைகள்

அலசப்பட்டு ஆராயப்பட்டுக் கொண்டிருக்கின்றன

இன்னும் சிறிது நேரத்தில்

பரிசோதனை அறிக்கைகள் வெளியாகக் கூடும்

வயிற்றுக்குள் இருந்து சத்தமிட்ட

பசியின் குரல்கள்

மெலிந்துப் போய் துடித்த

இதயத்தின் வேதனைகள்

பெரும்பாடு பட்டு சுவாசித்த

நுரையீரலின் முனகல்கள்

அறிக்கையில் இல்லாமல் போகக் கூடும்

சாட்சிகள் பிறழ்ந்துப் போய்

பொய் பிரகடனங்களை முழங்கக் கூடும்

சாட்சியங்கள் பிறழ்வதேது

சாட்சியங்கள் பொய் சொல்வதேது

அறிக்கைகளின் சாட்சியங்களைக் கொண்டு

வரலாறு மீண்டும் எழுதப்படும் போது

பொய்மைகளின் கண்கள் கூசுமளவுக்கு

மறைக்கப்பட்ட பிரதேசங்களில்

உடைத்துக் கொண்டோடும்

உண்மைகளின் வெளிச்சம்

வெள்ளக் காட்டைப் போல

*****