நெடும்பேச்சு
அதிகாலையில் நடைபயிற்சிக்கு சென்ற
நாங்கள் நெடுநேரம் பேசிக் கொண்டிருந்தோம்
நடுசாலையில் விழுந்து கிடப்பவரைப் பற்றி
இரத்த அழுத்தம் அதிகமாகி விழுந்திருக்கலாம் என்று
நான் சொல்வதை மறுப்பது போல
லோ சுகரில் கூட மயங்கியிருக்கலாம் என்றார் அவர்
அதிகாலை பெட் காபி போல
ஆல்கஹால் குடிப்போர் நினைவுக்கு வர
அப்படியும் இருக்காலாமோ என்ற
என் சந்தேகத்தை வெளிப்படுத்தியதும்
கஞ்சா கேஸாகவும் இருக்கலாம் என்றார் அவர்
இரவுணவு நஞ்சாகியும் விழுந்திருக்கலாம்
நஞ்சிட்டும் விழுந்திருக்கலாம்
எவரேனும் தாக்கி உள்காயமாகியும் விழுந்திருக்கலாம்
என
தோன்றும் சந்தேகங்களுக்கேற்ப
ஆம்புலன்ஸ் வந்து ஏற்றிச் செல்லும் வரை பேசிக் கொண்டிருந்தோம்
அதற்கு மேல் பேச வழியில்லாமல் போக
வேறு வழியில்லாமல் நடைபயிற்சியைத் தொடர ஆரம்பித்தோம்
*****
No comments:
Post a Comment