அற்புதத்தின் நாயகர் நீங்கள்!
ஒவ்வொருவருக்கும் ஒரு தனித்திறமை இருக்கத்தான் செய்கிறது. அதைக்
கண்டுபிடிப்பதில் தாமதம் ஆனாலும் பரவாயில்லை, பொறுமையாகக் கண்டுபிடியுங்கள். இன்னொருவரைக்
காப்பியடிக்க நினைத்து உங்கள் தனித்திறமையை இழந்து விடாதீர்கள். இந்த உலகம் எதிர்பார்ப்பது
உங்களது தனித்திறமையைத்தான். அதற்காகத்தான் அதை வெளிப்படுத்துவதற்காகத்தான் நீங்கள்
பிறந்துள்ளீர்கள்.
உங்களுக்கு அறிவில்லை என்று ஒருபோதும் நினைத்து விடாதீர்கள்.
உலகம் பல நேரங்களில் அப்படி உங்கள் காதோரம் வந்து சொல்லக் கூடும். உண்மை அதுவில்லை.
ஒவ்வொருவருக்கும் தனித்துவமான அறிவு இருக்கிறது. தனித்துவமான அறிவை உலகம் உடனடியாகப்
புரிந்து கொள்வதில்லை. உலகம் அதைப் புரிந்து கொள்ள காலம் தேவைப்படும் என்பதால் உங்களது
தனித்துவமான அறிவை இழக்க ஒருபோதும் சம்மதிக்காதீர்கள்.
எப்போதும் எந்தச் சூழ்நிலையிலும் உங்களுக்கு உங்கள் மீதான நம்பிக்கையை
மட்டும் விட்டுக் கொடுக்காதீர்கள். உங்களுக்கு உங்கள் மீதான நம்பிக்கை என்பது உங்களது
பிறப்புரிமை போன்றது. உலகம் அதைத்தான் முதலில் உடைக்கப் பார்க்கும். அதை உடைக்க முடியாது
என்பது இந்த உலகுக்குப் புரிந்து விட்டால் நீங்கள்தான் இந்த உலகின் நம்பிக்கை நட்சத்திரம்
என்பதைப் புரிந்து கொள்ளுங்கள்.
ஒவ்வொரு மனிதரும் இந்தப் பூவுலகிற்கு அவருக்கே உரிய தனித்திறனோடு
அற்புதங்கள் புரியத்தான் வருகை தந்துள்ளார்கள். உங்களுக்கான அற்புதங்களை நீங்கள்தான்
புரிய வேண்டும். உங்களுக்காக அதை யாரும் புரிய முடியாது என்பதால் உங்களது தனித்துவத்தை
எப்போதும் புரிந்து கொள்ளுங்கள்.
அற்புதங்கள் நிகழ்த்த கால தாமதம் ஆகலாம். அவ்வளவுக்கவ்வளவு அந்த
அற்புதம் மிக உயர்வாகப் பார்க்கப்படும் என்பதை மறந்து விடாதீர்கள். பொன்னான அற்புதத்தை
நிகழ்த்தப் போகும் காலத்திற்காகப் பொறுமையாகக் காத்திருங்கள். நம்பிக்கையை எப்போதும்
உடன் வைத்திருங்கள். உங்கள் அற்புதம் உலகைப் புது மாதிரியாக மாற்றும்.
*****
No comments:
Post a Comment