அனைத்துப் பிரச்சனைகளுக்கும் ஒரே தீர்வு

அனைத்துப் பிரச்சனைகளுக்கும் ஒரே தீர்வு

            'அதிகம் பேசாதே!' என்று கண்ணில் படும் இடங்களில் எல்லாம் எஸ்.கே. எழுதி வைத்திருக்கிறான். இது அவனைப் பல துயரங்களிலிருந்து காப்பாற்றுகிறது. அதிகம் பேசுவது எதையாவத உளறிக் கொட்டுவதற்குத்தான் வழி வகுக்கிறது. பேச்சில் அடக்கம், கண்ணியம், கட்டுபாடு முக்கியமானது.

            இப்போதெல்லாம் தன் பழைய கதைகளை எம்.கே.விடம் பேசுவதை எஸ்.கே. விட்டு விட்டான். அது ஆபத்தானது. எதைப் பற்றியும் யாரிடமும் பேசுவது தீர்வுக்கு வழி வகுப்பதாக இல்லை. குழப்பத்திற்கே இட்டுச் செல்கின்றன. எஸ்.கே. குழம்பாமல் ஒரு முடிவுக்கு வர வேண்டும் என நினைப்பவன். அது அவனுக்கு முடியாது. அதனால் விவாதத்தின் விளைவு மோசமாக அமைந்து விடுகிறது.

            பொறுமையாகவும், நிதானமாகவும் அமர்ந்தால் அல்லது உட்கார்ந்தால் தீர்வு கிடைத்து விடும். தீர்வுகள் எடுப்பதில் அது ஒரு நல்ல பயிற்சி ஆகும். கேட்டுக் கேட்டு முடிவு எடுத்துக் கொண்டிருந்தால் சுயமற்ற நிலை உருவாகும். தைரியமும், துணிவும் வேண்டும் எதையும் எதிர்கொள்ள. தைரியம் என்பதற்கானப் பொருளையும், துணிவு என்பதற்கானப் பொருளையும் ஒரு முறை டிக்சனரி பார்த்துத் தெரிந்து கொள்ளுங்கள்.

            தனக்குத் தெளிவு வேண்டுமானால் எஸ்.கே. தன்னிடம் பேசிக் கொள்ளட்டும். மற்றவர்களிடம் பேசக் கூடாது. அது அவர்களைக் குழப்பத்தில் ஆழ்த்தி, அந்தக் குழப்பத்தை ரசிக்கவும் செய்து விடுகிற ஒரு குதர்க்கமான நிலைக்குத் தள்ளி விடுகிறது.

            மற்றவர்களின் அங்கீகாரம் எஸ்.கே.வுக்குத் தேவையில்லாதது. அதை வைத்து கடையில் ஒத்தக் காசு மிட்டாய் கூட வாங்க முடியாது.

            உலகின் எல்லாப் பிரச்சனைகளுக்கும் தீர்வு இருக்கிறது என்றால் அது பொறுமைதான். பொறுமையைப் போன்ற சர்வரோக நிவாரணி இந்த உலகில் எதுவும் இல்லை. இதை எஸ்.கே. புரிந்து கொள்கிறானோ இல்லையோ, அவனை வாசிக்கும் நீங்கள் புரிந்து கொள்ள வேண்டும். ஏனென்றால் எஸ்.கே.வை வாசிப்பவர்களுக்கு அதுதான் அதிகம் தேவைப்படும்.

*****