(மற்றவர்) பேச்சில் கொஞ்சம் எச்சரிக்கையாக இருங்கள்!

(மற்றவர்) பேச்சில் கொஞ்சம் எச்சரிக்கையாக இருங்கள்!

            மனிதர்களிடம் பேசுவது வர வர அதிர்ச்சித் தரத்தக்க விதத்தில் இருக்கிறது. முன்பு சொன்னதையே மாற்றிப் பேசும் ஒரு நிலையில் இருக்கிறார்கள்.

            அவர்கள் மாற்றிப் பேசுகிறான் என்று சொல்ல முடியாது. மனசு என்பது அப்படித்தான். நொடிக்கொரு தரம் மாறிக் கொண்டு இருக்கும். அது பேச்சாக வெளிப்படும் போது மாற்றி மாற்றிப் பேசுவது போல்தான் இருக்கும்.

            இதற்காக யாரை நோவீர்கள்? அப்படியே ஆகுவதாகுக என்று விட்டு விடுங்கள்.

            "உங்களுக்குத் திருமணம் வேண்டாம் என்றால் ஏற்றுக் கொள்வீர்களா? திருமணம் நடந்து அதனால் ஏகப்பட்ட கருத்து வேறுபாடுகளை சந்தித்தப் பிறகு நீங்களாகவே அந்த முடிவுக்கு வந்து விடுவீர்கள்.

            அப்படியே ஆகுவதாக என்று அப்போது நான் விட்டு விட்டால் தப்பித்தேன். திருமணம் வேண்டாம் என்று அப்போது வற்புறுத்தி இருந்தால் நான் தொலைந்தேன்."

            என்று சொன்ன எஸ்.கே.வின்  மேலும் ஒரு வாழ்க்கைச் சுருக்கத்தைப் பாருங்கள். நீங்கள் புரிந்து கொள்வீர்கள். இது ஓர் அரிதான குறுக்கு வெட்டுத் தோற்றம். படித்துப் பாருங்கள்.

            "நான் எண்ணுவதற்கும், அவர் எண்ணுவதற்கும் ஒத்தே வராது. ஆகவே நாங்கள் இணைந்து இந்த வேலையில் இறங்கி இருக்க வேண்டிய அவசியமே இல்லை.

            ஆனால் நான் அதை நிகழ்த்திக் காட்ட வேண்டும் ஆசையில் இருந்தேன். பணத்தைக் கையில் வைத்துக் கொண்டு எதையும் திறம்பட நிகழ்த்திக் காட்ட முடியவில்லையே என்று அங்கலாய்த்தும் இருக்கிறேன். அதோடு இப்படிப்பட்ட செயல்களை நிகழ்த்திக் காட்டுவது அரிதினும் அரிது என்பது போல மாயத்தோற்றமும் அவரால் நிகழ்த்திக் காட்டப்பட்டது. என் ஆசையாலும், அவரின் மாயவலையாலும் நான் அதில் வீழ்ந்து விட்டேன்.

            இனி மெல்ல அதிலிருந்து மீண்டாக வேண்டும். வார்த்தைகளை விட்டு சிக்கலை மேலும் சிக்கலாக்கிக் கூடாது. மெளனமாக நகரப் பார்க்க வேண்டும்.

            அவரின் ஸ்டேட்மென்ட் மீது நம்பிக்கை வைத்து பதிலுக்குப் பதில் சொல்லிக் கொண்டு இருக்கக் கூடாது. அது நாளைக்கே மாறக் கூடியது. அவரது ஸ்டேட்மெண்ட் முழுமையாக நம்புவதற்கு உரியது கிடையாது. அதில் கணிசமான பொய்யும் அடங்கி இருக்கிறது. அதை முன் வைத்து நகர்வது என்பது ஆபத்தானது."

*****