எண்ணெய் சுழற்சி

எண்ணெய் சுழற்சி

            உங்களுக்கு எண்ணெய் சுழற்சி பற்றி தெரியாது என்று நினைக்கிறேன். இது நீங்கள் நினைப்பது போல அறிவியல் பாடத்தில் படித்த சங்கதியன்று. இது முற்றிலும் புதிதானது. நீங்கள் அவசியம் தெரிந்து கொள்ள வேண்டும். இங்கு(உங்கள் நிலப்பகுதி) எண்ணெயைச் சுழற்சி முறையில் பயன்படுத்துகிறார்கள்.

            தரமான ஸ்வீட் கடைகள் என்று சொல்லப்படுவைகள் ஒருமுறை பயன்படுத்திய எண்ணெயை மறுமுறை பயன்படுத்துவதில்லை. அந்த எண்ணெயை அவர்கள் டின்களில் அடைத்து விற்கிறார்கள். அதை சுமாரான ஸ்வீட் கடைகள் என்று சொல்லப்படுபவைகள் வாங்கிப் பயன்படுத்துகிறார்கள். அவர்கள் தாங்கள் பயன்படுத்தி முடித்த பிறகு அந்த எண்ணெயை அவர்களும் விற்கிறார்கள். அதை சிறு சாப்பாட்டுக் கடைகள் என்று சொல்லப்படுபவைகள் வாங்கிப் பயன்படுத்துகிறார்கள்.

            எண்ணெய் அதன் கடைசிச் சொட்டு வரைக் கொதிக்கக் கொதிக்கப் பயன்படுத்திப் பயன்படுத்திக் கைமாறிக் கொண்டே இருக்கிறது. பதார்த்தங்களை வாங்கித் தின்பவர்கள் வயிற்று நோய்களாகவும், தோல் நோய்களாகவும் இன்ன பிற நோய்களாகவும் அவஸ்தையை அனுபவிக்க வேண்டியிருக்கிறது.

            கடைகளில் குறைந்த விலையில் விற்கப்படும் நல்லெண்ணெய் போன்ற எண்ணெய் பாக்கெட்டுகளும் மற்றும் இதர எண்ணெய் பாக்கெட்டுகளும் இது போன்று பயன்படுத்தப்பட்ட எண்ணெய்களை வாங்கி பாக்கெட் போட்டு விற்கப்படுபவைகள்தான் என்கிறார்கள் கடைக்காரர்கள். எப்படி இப்படி குறைந்த விலையில் எண்ணெயை விற்க முடிகிறது என்ற கேள்விக்குக் கிடைத்த சான்றாதாரமான பதில்தான் மேற்கண்டபடி இருக்கிறது.

            நூற்று எண்பது ரூபாய்க்கு பாக்கெட்டில் அடைக்கப்பட்ட எண்ணெய் வாங்குபவர்க்கு எண்ணெய் அதன் அசல் தரத்தில் கிடைக்கிறது என்றால், தொன்னூறு ரூபாய்க்கு அதே அளவு பாக்கெட்டில் அடைக்கப்பட்ட எண்ணெயை வாங்குபவர்க்கு யாரோ ஒருவர் பயன்படுத்திய செகண்ட் ஹேண்ட் எண்ணெய்தான் கிடைக்கிறது.

            செகண்ட் ஹேண்டில் சைக்கிள், டூவீலர்கள், கார்கள், செல்கள், கம்ப்யூட்டர்கள் விற்கப்படுவது போல எண்ணெய்களும் விற்பனையாகின்றன. என்ன ஒரு வித்தியாசம் என்றால் செகண்ட் ஹேண்டில் ஒரு சைக்கிள் விற்பனை ஆகிறது என்றால் அது செகண்ட் ஹேண்டில் விற்பனை ஆகிறது என்பது வாங்குவர்க்குத் தெரியும். அது எண்ணெய் விசயத்தில் தெரியாது. அழகான பாக்கெட்டில் அடைக்கப்பட்டிருக்கும் அந்த எண்ணெய் செகண்ட் ஹேண்ட்டா? தேர்ட் ஹேண்டா? போர்த் ஹேண்டா? அதிர்ஷ்டம் இருந்தால் நாம் வாங்கும் எண்ணெய் நாம் முதலில் பயன்படுத்தும் எண்ணெயாகவும் இருக்கலாம். துரதிர்ஷ்டம் என்றால் சொல்லத் தேவையில்லை. விதியை நொந்து கொண்டு வாங்கிச் சமைப்பதைத் தவிர வேறு என்ன வழியிருக்கிறது என்று தெரியவில்லை.

            இங்கு எண்ணெய் மிக அதிக விலைக்கும் கிடைக்கிறது. மிக குறைந்த விலைக்கும் கிடைக்கிறது. இவ்வளவு குறைந்த விலைக்கு எண்ணெய் கிடைக்கும் ஒரு பகுதியை நோக்கி அமெரிக்கக்காரன் படையெடுக்காமல் இருப்பது ஆச்சர்மான ஒன்றுதான் அல்லவா!

*****