எதையும் சாதிக்கும் முன் இதைப் பரிசீலியுங்கள்!

எதையும் சாதிக்கும் முன் இதைப் பரிசீலியுங்கள்!

            எதிலும் பிரச்சனை என்பது அதில் அதிகமாகப் போவதால் நிகழ்கிறது. அதிகமாகப் போவதைக் குறைத்து விட்டால் பிரச்சனை தானாக நின்று விடும். பால் பொங்குவதற்குக் காரணம் அதிகமாக எரிவது. அதிகமாக எரிவதைக் குறைத்து விட்டால் பொங்குவது நின்று விடும். அது போலத்தான்.

            மன அளவில் அலட்டிக் கொள்வதே எல்லா பிரச்சனைகளும். அலட்டிக் கொள்ளாமல் இருந்தால் எந்தப் பிரச்சனையும் இல்லை. அலட்டிக் கொள்வதால்தான் பிரச்சனைகள் தோன்றுகின்றன. அதை நிறுத்தி விட்டால் பிரச்சனைகள் மறைந்து விடுகின்றன.

            நீங்கள் யாரையும் தோற்கடிக்க வேண்டியதில்லை. அவர்களாகவே தோற்றுப் போவார்கள். ஆகவே யாரிடமும் எதையும் நிரூபித்துக் காட்டுகிறேன் என்று முட்டாள்தனமாக எதையாவத செய்து கொண்டிருக்க வேண்டாம்.

            இவர்கள் மத்தியில் எதையாவது செய்ய வேண்டும் நினைக்கிறேன் என்கிறீர்கள். அவர்கள் ஒத்துழைப்புக் கொடுக்கவில்லை என்று புலம்புகிறீர்கள். அதனால் சோர்ந்து போய் விட்டதாகப் பிலாக்கணம் பாடுகிறீர்கள். அவர்கள் ஒத்துழைப்புக் கொடுக்காததை உங்கள் தோல்வியாக நினைத்துக் கொள்கிறீர்கள்.

            யார் ஒத்துழைப்புத் தந்தும் நீங்கள் எதையும் செய்ய வேண்டியதில்லை. அவர்கள் மத்தியில் எதையும் சாதிக்க வேண்டியதில்லை. அப்படி எதையாவது சாதித்து என்ன என்னப் பண்ணப் போகிறீர்கள்?

            நீங்கள் பாட்டுக்கு உங்களுக்கு எது உகந்தது என்று கருதுகிறீர்களோ, அதைச் செய்து கொண்டு இருங்கள். நீங்கள் விரும்புவது தானாக உங்கள் மடியில் வந்து விழும்.

            எதையும் அடைய வேண்டும் என்று செய்து மன அழுத்தத்திற்குள் மாட்டிக் கொள்ளாதீர்கள். மனஅழுத்தம் இருக்கின்ற கொஞ்ச நஞ்ச பலன்களையும், கிடைக்க வேண்டிய கொஞ்ச நஞ்ச வாய்ப்புகளையும் அழித்து விடும். பலனைக் குறித்த கறாரான எண்ணங்கள் வேண்டாம். என்ன நடக்குமோ என்ற தேவையற்ற அச்சங்கள் வேண்டாம்.

            நம்மை ஆசை காட்டிதான் ஏமாற்றுகிறார்கள். இதைப் புரிந்து கொண்டால் புத்தி கெடாது. புத்திகெட்டத் தனமாக மனமும் யோசித்துக் கொண்டு இருக்காது.

            சின்ன சின்ன சோம்பேறித்தனங்கள், சின்ன சின்ன பயங்கள், சின்ன சின்ன தயக்கங்கள் இவற்றை முதலீடாகக் கொண்டு உங்களை மிரட்டுபவர்கள், உங்கள் மீது அதிக்கம் செலுத்துபவர்கள், உங்களைச் சுரண்டுபவர்கள் உருவாகிக் கொண்டு இருக்கிறார்கள். ஆகவே அந்தச் சின்ன சின்ன விசயங்களை விட்டு விடுங்கள்.

            இவர்கள் மத்தியில் என்ன செய்யப் போகிறேன்? எப்படிச் செய்யப் போகிறேன்? எதைச் செய்யப் போகிறேன்? என்றெல்லாம் யோசித்துக் கொண்டிராமல் இயல்பாக உங்களுக்கு என்ன செய்ய வருகிறதோ அதைச் செய்து கொண்டிருங்கள். எந்தப் பிரச்சனையும் இருக்காது.

            எல்லாவற்றிலும் மனசஞ்சலம் மோசமானது. அதுதான் எண்ணங்களைச் சிதறடிக்கிறது. புத்திப் பேதலிக்கச் செய்கிறது. ஒவ்வொன்றிலும் பிரச்சனை என்னவென்றால் மனதால் அதை விட முடியாமல் தவிப்பதுதான். இதைப் புரிந்து கொள்ளுங்கள்.

*****