குழப்பச் சங்கிலிக்கான விடுவிப்பு

குழப்பச் சங்கிலிக்கான விடுவிப்பு

            எதைச் செய்வது?

            எப்போது செய்வது?

                        என்ற குழப்பம் எல்லாரையும் வாட்டிக் கொண்டிருக்கும் கால கட்டம் இது.

            நீங்கள் செய்ய வேண்டியப் பணிகள்,

            1. காலையில் எழுந்தவுடன் மலம் கழிப்பது. பெரும்பாலும் முக்கல் இல்லாமல் கழிப்பது நல்லது. முக்கும் நிலைமையில் இருந்தால் காத்திருப்பது நல்லது. காத்திருப்பிற்கு நல்ல பலன் இருக்கும்.

            2. முடிந்தால் பல் துலக்குவது. முடியாவிட்டால் ஒரு பப்புள்கம்மை மென்று தின்று துப்பி விடுங்கள். நாள்முழுக்க யார் யாரிடமோ பேச வேண்டியிருக்கும். அதில் உங்களைக் காதலிக்க விருப்பமுள்ள யாரேனும் இருக்கக் கூடும். அசாதாரண நேரங்கள் அதனால் விலகி விடக் கூடாது.

            3. எதாவது ஒரு புத்தகத்தின் சில பக்கங்களைப் படியுங்கள். அது வாசிக்க வாசிக்கப் புரியாத புத்தகமாக இருப்பது நல்லது.

            4. எதாவது ஒரு தலைப்பில் சிறிது நேரம் ஆய்வு செய்யுங்கள். உதாரணமாக இன்று இரு சக்கர வாகனத்தை எப்படி முதல் உதையிலேயே கிளம்ப வைப்பது என்பது போன்று.

            5. வாட்ஸ் அப்பிலோ, பேஸ்புக்கிலோ எதையாவது ஒன்றை பதிவிட்டு விடுங்கள். அல்லது, எதாவது ஒன்றை லைக் செய்து அதை ஷேர் செய்து விடுங்கள். நம் இருப்பை இந்த உலகிற்கு நிரூபிப்பது முக்கியம்.

            அப்புறம்,

            காலை 6.55 முதல் 7.23 வரை தோட்டப் பராமரிப்பு

            மாலை 7.24 முதல் 8.25 வரை புத்தகங்களின் தூசுத் தட்டி அடுக்கி வைப்பது

இப்படி எதாவது எழுதி வைத்துக் கொள்ளுங்கள். இதை யாரேனும் தற்செயலாகப் பார்த்தால் கூட போதும், நம் மதிப்பு இந்தச் சமூகத்தில் உயரப் போவது நிச்சயம். பின்பற்றிப் பாருங்கள். முன்னேற்றம் இருந்தாலும் சரி, இல்லாவிட்டாலும் சரி... இது பற்றி நாலு பேரிடம் கூறுங்கள். அவர்களாவது முன்னேறட்டும்.

            அப்புறம் இதன் எதிர்புறத் தன்மை குறித்தும் எச்சரித்து விடுகிறேன். ஏற்கனவே பணிகளால் நிரம்பிக் கொண்டிருப்பவர்கள் அதற்கு மேல் பணிகளை நிரப்பிக் கொள்ளாதீர்கள். வெடித்து விடுவீர்கள்.

            யோசித்துக் கொண்டே இராதீர்கள். செயலில் இறங்குங்கள். விழுந்து அடிபட்டால்தான் டாக்டருக்கு அப்பாய்ன்மென்ட் இருக்கும்.

*****