வேண்டுதல் வேண்டாமை
புலால் நாற்றம் பிடிக்காது
எனும் ஒருவன்
பீப் கறி விரும்பிச்
சாப்பிடுவான்.
*****
மாறும் காலங்கள்
"தாக சாந்தி பண்ணுங்க!"
என்று
ஊருக்குள் வந்தவர்கட்கெல்லாம்
மோரும், நீரும் வழங்கியிருப்பார்கள்
வாட்டர் கேன்கள் வராத
ஒரு காலத்தில் வாழ்ந்தவர்கள்.
தாகத்திற்காக தண்ணீர்
பருக
வரும் யானைகளை
வெடி வைத்தும், மின்சார
வேலி வைத்தும்
விரட்டிக் கொண்டு இருக்கிறவர்களாக
ஆனார்கள்
அதன் எதிர் காலத்தில்
வாழ்பவர்கள்.
எல்லாம் ஒரு சாண் வயிற்றுக்காக
என்று விளக்கம் கொடுத்து
ஓய்ந்தவர்கள்
எல்லாம் ஒரு சொட்டு
தண்ணிக்காக
என்று புலம்பித் தள்ளுபவர்கள்
கடைசி அருவியை, கடைசி
மழையை,
கடைசி ஆற்றை, கடைசி குளத்தை,
கடைசி ஊற்றைப் பார்த்த
பெருமைக்குரியவர்கள்.
*****
No comments:
Post a Comment