வானம், பூமி, மற்றும் சில போர்த்துகீசிய வார்த்தைகள்

வானம், பூமி, மற்றும் சில போர்த்துகீசிய வார்த்தைகள்

வானிலை இலாகா மீண்டும் ஒருமுறை தீர்க்கதரிசியாக அவதரித்திருக்கிறது. இந்த முறையும் அவர்கள் கையில் வைத்திருக்கும் ஆயுதம் முன்னெச்சரிக்கை.

பத்து ஆண்டுகளில் இல்லாத ஒரு வறட்சி நம்மை நோக்கி மெல்ல ஊர்ந்து வருவதாகச் சொல்கிறார்கள்.

காரணம்?

பசிபிக் பெருங்கடலில் குளித்துக் கொண்டிருக்கும் எல்நினோ என்றொரு வெப்பநீரோட்டம்.

மனிதர்களுக்குப் பெயரிடுவதில் இருக்கும் சுவாரசியத்தை விட, கடல்களுக்குப் பெயரிடுவதில் விஞ்ஞானிகளுக்கு அதிக ஆர்வம் இருக்கிறது.

பசிபிக் கடலின் ஒரு பகுதியில் சில ஆண்டுகள் வெந்நீர் ஓடுமாம்; அதற்கு எல்நினோ என்று பெயர்.

சில ஆண்டுகள் ஜில்லென்று நீர் ஓடுமாம்; அதற்கு லாநினோ என்று பெயர்.

இவை இரண்டும் போர்த்துகீசிய வார்த்தைகள் என்று வானிலை அறிக்கை நமக்கு மிகவும் அக்கறையோடு பாடம் நடத்துகிறது.

பசிபிக் கடலில் இருக்கும் தண்ணீருக்குப் போர்த்துகீசியர்கள் ஏன் பெயரிட்டார்கள், அதைக் கேட்டு நாம் ஏன் இப்போது பயப்பட வேண்டும் என்ற தத்துவார்த்தக் கேள்விக்கு நம்மிடம் பதிலில்லை.

இந்தியர்களுக்கு மழை என்பது ஏதோ வானத்திலிருந்து விழும் தண்ணீர் மட்டுமல்ல; அது ஒரு வாழ்வாதாரக் கணக்கு.

நமக்கு இரண்டு பருவக் காற்றுகள் உண்டு. ஒன்று, அக்டோபர் மாதவாக்கில் வரும் வடகிழக்கு பருவக்காற்று. தமிழ்நாடு, ஆந்திரா, கேரளா போன்ற தென் மாநிலங்கள் இதன் மூலம் தப்பிப் பிழைக்கின்றன.

இன்னொன்று, ஜூன் மாதம் தொடங்கும் தென்மேற்கு பருவக்காற்று. நாட்டின் எண்பது சதவீத மழையைத் தீர்மானிப்பது இதுதான். இமயமலையின் கிழக்குச் சரிவில் இருக்கும் சில இடங்கள் 1000 சென்டிமீட்டருக்கும் மேல் மழையை வாங்கி சொதசொதவென்று நனையும்.

இந்த ஆண்டு மே 26லேயே மழை வந்துவிடும் என்று வானிலை இலாகா முதலில் ஆருடம் சொல்லியிருந்தது. நாமும் குடைகளைத் தூசு தட்டி வைத்திருந்தோம்.

ஆனால், இயற்கை எப்போதும் மனிதனின் கணிப்புகளைக் கண்டு அற்பமாகப் புன்னகைக்கக் கூடியது.

இப்போது வரை தென்மேற்குப் பருவமழை வந்தபாடில்லை. இன்னும் தாதமாகிறது. அப்படி வந்தாலும் குறைவாகத்தான் மழை தருமாம்.

தத்துவம் என்னவென்றால், பசிபிக் கடலில் எழும் ஒரு சிறிய வெப்ப அலை, இந்தியப் பெருங்கடலின் காற்றை உலர வைக்கிறது. மேகங்களில் இருக்கும் நீர்ப்பசை வற்றிப்போகிறது.

கடலில் ஈரப்பதம் குறைந்தால், நிலத்தில் மனிதர்களின் தொண்டை வறள்கிறது. கடைசியாக 2015இல் இப்படித்தான் எல்நினோ வந்து நம்மைப் படுத்தியது.

அப்போது எண்பத்தாறு சதவீத மழைதான் பெய்ததாம். இந்த முறை தொண்ணூறு சதவீதத்திற்கும் கீழே போகும் என்று கணித்திருக்கிறார்கள். அதற்குக் கீழே போகாதுஎன்பதற்கெல்லாம் எந்த உத்தரவாதமுமில்லை. போனாலும் போனதுதான்.

வழக்கம்போல, வறட்சி வரப்போகிறது என்ற செய்தி கேட்டவுடன் மனிதர்களாகிய நாம் பதற்றமடையத் தொடங்கிவிட்டோம்.

ஆனால், தண்ணீரே இல்லாத மேகங்களைச் சுமந்துகொண்டு வானத்தில் அலைந்து கொண்டிருக்கும் அந்தப் பருவக்காற்றின் சோகத்தை எவரும் சிந்திப்பதில்லை. பெய்ய வழியில்லாத மேகம், சொல்ல முடியாத கவிதை போன்றது.

வானிலை இலாகா எச்சரித்துவிட்டது. இனி நாம் செய்ய வேண்டியது ஒன்றே ஒன்றுதான். அது என்னவென்றால், அடுத்த முன்னெச்சரிக்கை வரும் வரை, இந்த வறட்சியை எப்படி எதிர்கொள்வது என்று ஒரு தத்துவார்த்தக் குழப்பத்துடன் காத்துக்கொண்டிருப்பதுதான்.

*****