காது கொடு உபதேசிக்க by எஸ்.கே.
உலகின் மோசமான வியாதி என்றால் உன் மனதை
நீயே பாதித்துக் கொள்வதுதான். அதைப் போன்ற தனக்குத் தானே தண்டித்துக் கொள்ளும் மோசமான
மனோபாவம் இந்த உலகில் இல்லை.
எல்லாம் அதுவாக வரும் என்கிற போது, நீ
எதற்கு அவசரப்படுகிறாய்? சும்மா பொழுது போகவில்லை என்பதற்காக எதாவது செய். மற்றபடி
காரியம் நடக்க வேண்டும் என்பதற்காக எதையும் செய்ய வேண்டியதில்லை.
நீயாக உன் மனதிடம் இதைச் செய்ய வேண்டும்,
அதைச் செய்ய வேண்டும் என்று பாதித்துக் கொண்டால் ஒழிய உன் மனதை யாரும் எதையும் செய்ய
முடியாது. நீயாக உன் மனதை கஷ்டபடுத்திக் கொண்டால் ஒழிய யாரும் உன் மனதைக் கஷ்டபடுத்தி
விட முடியாது.
வாழ்க்கையில் எதுவும் அவசரம் கிடையாது.
நாம் வாழப் போகும் மொத்த வாழ்க்கையைப் பார்க்கையில் மெதுவாக நடக்கலாம் எல்லாமும்.
பகுதியாகப் பார்க்காமல் முழுமையாகப் பார்த்தால்
எல்லா பிரச்சனையும் தீர்ந்து விடும். பகுதியாக்கிப் பார்ப்பது, துண்டாக்கிப் பார்ப்பது
என்பது பிரச்சனைதான். அது முழுமையைக் காட்டுவதில்லை. பின்னத்தைத்தான் காட்டுகிறது.
ஆனால் வாழ்க்கை முழுமையானது. முழுமையாகப் பார்ப்பவர்களுக்கு அதன் முழுமை விளங்கும்.
பகுதியாகப் பார்ப்பவர்களுக்கு பிரச்சனை மட்டுமே விளங்கும். மிகவும் ஆபத்தான் ஒரு பார்வை
அது.
உபதேசம் போதும் என்று நினைக்கிறேன். ரொம்ப
உபதேசித்தால் எனக்கே மண்டை கனத்து விடும் போலிருக்கிறது. உங்களுக்கு மண்டை கனப்பது
போல இருந்தால் ஓய்வெடுத்துக் கொண்டு படியுங்கள். படிப்பைப் போல ஓய்வும் அவசியம்.
*****
No comments:
Post a Comment