பந்தயக் குதிரை

உயிர் பயம்

மீனைத் தூக்கி

தண்ணீரில் போட்டால் நீந்துகிறது

குளத்தில் போட்டால் அலறுகிறது

மீன்தொட்டி எங்கே

என்ற உயிர் பயத்தில்!

*****

பந்தயக் குதிரை

கால் உடைந்த குதிரை

அதன் பின்

சர்க்கஸில்

ஓடிக் கொண்டிருக்கிறது!

ஒரு நொண்டிக் குதிரை

சுற்றிச் சுற்றி வேகமாக ஓடுவதை

ஆச்சர்யத்துடன்

வேடிக்கைப் பார்க்கின்றன

ஆயிரம் கண்கள்!

கரவொலிகளைக் கேட்டு

குதிரைப் பந்தயத்தில்

ஓடியதை விட

வேகமாக ஓட எத்தனிக்கிறது

குதிரை!

அதைப் பார்த்து

நொண்டிக் குதிரை

விழுமா

விழாதா என்று

சர்க்கஸ் கூடாரத்தில்

பந்தயம் கட்டிக் கொண்டு

இருக்கின்றனர் இருவர்!

*****