வேலைவாய்ப்புக்கு வாய்ப்பு உண்டா?

வேலைவாய்ப்புக்கு வாய்ப்பு உண்டா?

            வேலைவாய்ப்பு என்ற ஒற்றை வார்த்தையைக் காட்டி ஆசை காட்டுவது நமது சமூகத்துக்குப் புதிதா என்ன?

            அரசியல்வாதிகள் ஒவ்வொரு தேர்தலிலும் அதைதான் வாக்குறுதியாகச் சொல்கிறார்கள்.

            தொழிலதிபர்கள் மற்றவர்களுக்கு வேலை வாய்ப்பைக் கொடுப்பதற்காகவே தொழில் தொடங்குவதாகச் சொல்கிறார்கள்.

            படிக்கும் போதே வேலைவாய்ப்பு முகாம்கள் மூலம் வேலை கிடைத்து விடும் என்று தனியார் கல்லூரிகள் உத்திரவாதம் கொடுக்கிறார்கள்.

            வேலை வாய்ப்பு நிறுவனங்கள் என்ற பெயரிலே அமைப்புகள் தொடங்கப்பட்டு அங்கு பத்து பதினைந்து பேர் வேலை பார்க்கிறார்கள்.

            வேலை நாட்டு வேலை வாய்ப்பு நிறுவனங்கள் என்ற பெயரில் அதில் தனிப்பிரிவுகள் வேறு வைத்து இருக்கிறார்கள்.

            சமூகத்தின் அடிமட்ட மக்கள் இதையெல்லாம் எந்தக் காலத்திலும் பொருட்படுத்தியதில்லை. அவர்கள் கிடைத்த வேலையைச் செய்து கொண்டு, உண்டு, உடுத்தி, உறைவிடத்தோடோ அல்லது இவைகள் எதுவும் இல்லாமலோ, ஒன்றிரண்டகள் இல்லாமலோ வாழ்ந்து கொண்டிருந்தார்கள்.

            இனி அவர்கள் என்ன செய்யப் போகிறார்கள்?

            குறிப்பாக காவிரி டெல்டாவின் கடைமடைப் பகுதிகளில் வாழ்ந்து வரும் மக்கள்.

            வான் பொய்ப்பினும் தான் பொய்யாக் காவிரி கர்நாடகத்தோடு தன் சிறப்பை நிலைநாட்டிக் கொண்டு நின்று விட்டது. தமிழகத்தில் பாயும் காவிரிக்கு இனித் தனிச் ‍செய்யுள் எழுத புதிய புலவர்தான் பிறந்து வர வேண்டும்.

            பெய்ய வேண்டிய மழை பெய்யாமல் நின்று விட்டது.

            இந்த இரண்டாலும் ஏற்பட்ட விவசாய கூலி வேலை இழப்புகள் ஏராளம்.

            இப்படி ஒரு நிலைமை ஒரு ஏற்படும் சமயத்தில், அருகாமையில் இருக்கும் நகர்ப்புற பகுதிகளுக்கு கூலி வேலைகளுக்கும், எடுபிடி வேலைகளுக்கும் சென்று நிலைமையைச் சமாளிக்கும் அன்றாடங் காய்ச்சிகள் நிறைந்த பூமியில் அதற்கும் தற்போது வாய்ப்பறுந்துப் போய் விட்டது.

            இந்தப் பணமாற்ற நடவடிக்கை பலவற்றை முடக்கிப் போட்டு வைத்திருக்கிறது.

            ஆற்றைப் பார்த்தால் தண்ணீர் இல்லை.

            அண்ணாந்து பார்த்தால் மேகம் இல்லை.

            அக்கம் பக்கம் பார்த்தால் வேலை கொடுக்க பணமில்லை.

            இந்த முக்கோணச் சூழ்நிலையில் மூச்சைப் பிடித்துக் கொண்டு உட்கார்ந்திருக்கின்றனர் சாமான்யர்கள். எந்தப் பிடிமானமும் இல்லாத நிலையில் பிடித்துக் கொண்டு உட்கார்ந்திருக்க அது ஒன்று மட்டுமே அவர்களிடம் இருக்கிறது இப்போது! நிலைமை மாறுவது எப்போது?

*****