இருப்பு

அறிதல்

மலரிலிருந்து விடுபட்டு

வேகமாகச் சரிந்தோடும்

மழைத்துளி போல

நழுவி ஓடுகிறாய்!

ஏதோ ஒரு நாளில்

மலர் மேல் பூக்கும்

பனித்துளியாய்

நீ மலர்வாய் என்பதும்

அறிதலுக்கு அப்பால்

அறியா மலராய்

நீ பூத்துக் கொண்டிருப்பதையும்

நான் அறிவேன்

நீ அறியாய்!

*****

இருப்பு

அரசியலுக்கு அப்பாற்பட்டு

செய்யப்பட்ட

ஒரு உதவிதான்

அரசியலுக்கு உட்பட்டு

விளம்பரமாகிறது!

எல்லாம் தெரிந்தும்

கைநீட்டத்தான் தெரிகிறது

கை நீட்டி மறுக்கத் தெரியவில்லை

கை இருக்கும் எமக்கு!

*****