திரும்பிச் சென்ற மழை

திரும்பிச் சென்ற மழை

வேகமாக அடித்தது காற்று

வாகனக் கரும்புகையைப் போல.

சருகுகள்

பறவைகளைப் போல் பறந்து சென்றன.

வலிப்பு வந்தவனைப் போல்

வெட்டி வெட்டி இழுத்தது

மின்னல்.

மறுப்புக் காட்டுவது போல்

கருப்புக் குடையை விரித்ததும்

திரும்பிச் சென்று விட்டது மழை!

*****

கடத்தல்

நடுசாலையில்

நண்பகலில்

மினுமினுக்கச்

சென்று கொண்டிருக்கும் பாம்பு

பொருட்படுத்துவதேயில்லை

எந்த ஹாரன் ஒலியையும்.

அதை அடித்துச் செல்ல

விருப்பம் இல்லாத

வாகனங்கள் நின்றிருக்க

அதிவேகமாய் வந்த வாகனம் ஒன்று

சாலையை

ரத்த சகதியாக்கிச்

சதைக் கூளங்களாக்கிச்

சென்று கொண்டிருக்கிறது.

*****