எனக்கொரு பேருந்து இருக்கிறது

எனக்கொரு பேருந்து இருக்கிறது

பேருந்து என்னை அழைத்துச் செல்கிறது

கொண்டு வருகிறது

அதற்கொரு ஓட்டுநர் இருக்கிறார்

நடத்துநர் இருக்கிறார்

நடுவில் தள்ளி நசுக்க

பெருங்கூட்டம் இருக்கிறது

சாலையில் வேகத்தடைகள் இருக்கின்றன

பாதாளப் பெருங்குழிகள் இருக்கின்றன

நடுவழியில் பேருந்து நின்றிருக்கிறது

பெருமழையில் ஒரு நாள் வராமல் இருந்திருக்கிறது

எந்த இருக்கை எந்த இடம் என்று

நிச்சயமில்லா விட்டாலும்

எங்கேயோ ஓர் இடம் தந்து

பேருந்து என்னை அழைத்துச் செல்கிறது

என்னை அழைத்துச் செல்லவும்

கொண்டு வந்து விடவும்

ஒரு பேருந்து இருக்கிறது என்றால்

ஆச்சரியமாய்ப் பார்க்கிறார்கள்

ஆச்சரிமாய்ப் பார்க்க என்ன இருக்கிறது

உங்கள் இரு சக்கர வாகனத்தையோ காரையோ

நீங்கள் அழைத்துச் செல்ல வேண்டும்

அழைத்துக் கொண்டு வர வேண்டும்

அப்படியானால் நீங்கள் ஆச்சரிமாய்ப் பார்க்க

காரணம் இருக்கத்தான் செய்கிறது

என் ஆச்சரியப் பேருந்து தினம் தினம் வருகிறது

எனக்குத் துணையாய்

எத்தனையோ பேரை அழைத்துக் கொண்டு

உங்களுக்குத் துணையாய்

ஒருவரையேனும் உங்கள் வாகனம் அழைத்து வந்திருக்கிறதோ

*****