வீட்டைத் தள்ள முயற்சித்தவர்

வீட்டைத் தள்ள முயற்சித்தவர்

பக்கத்து வீட்டுக்காரர் விசித்திரமானர்

பக்கத்து வீட்டுக்காரராய் இருக்க விருப்பமில்லாதவர்

அவருக்கு என் வீடு

இன்னும் நான்கு வீடுகள் தள்ளி இருக்க வேண்டும்

ஒரு முறை என் வீட்டைத் தள்ளிப் பார்த்திருக்கிறார்

முடியாது எனத் தெரிந்து

முயற்சியைக் கைவிட்டிருக்கிறார்

நான் நகராமல் இருந்த

என் வீட்டிற்கு நன்றி சொல்லிக் கொண்டேன்

எப்போது பார்த்தாலும்

ஏதாவது பேசி விடுவோனோ என்ற பதற்றத்தில் இருக்கிறார்

அணு பொழுதும் அலுப்புறாது

அலைபேசியில் யார் யாருடனோ பேசிக் கொண்டிருக்கிறார்

எனத் தெரிந்து

அலைபேசியில் அழைத்துப் பார்த்தேன்

பக்கத்து வீட்டுக்காரர் எனத் தெரியாது பேசிக் கொண்டிருந்தவர்

அது அறிந்ததும் பட்டெனத் துண்டித்துக் கொண்டார்

சரிதான் போ என

பேசா மடையரின் பக்கத்தில் இருப்பது வெறுத்து

நான்கு தெருக்கள் தள்ளி குடி புகுந்தேன்

பக்கத்து வீட்டுக்காரர் பேசத் துவங்கியிருந்தார்

பேசுவதற்கு வசதியாகப் பக்கத்து வீட்டில் குடி வரவா என்றதற்கு

வேண்டாம் நாம் பேசிக் கொண்டிருக்க வேண்டும் என்றார்

பக்கத்து வீட்டுக்காரர்கள் பேசாது போனால்

வருத்தம் கொள்ளாதீர்கள்

இரண்டு வீடுகள் தள்ளி இருப்போரிடம் பேசிக் கொள்ளுங்கள்

*****