வாழாத வாழ்க்கையும் வாழக் கூடாத வாழ்க்கையும்

வாழாத வாழ்க்கையும் வாழக் கூடாத வாழ்க்கையும்

சொற்கள் சிதறும்

கனவுப் புணர்ச்சியில்

நிகழ்வுகள் ஒரு விளையாட்டு

கலைத்துப் போடப்பட்ட சீட்டுக்கட்டு

பாம்பொன்று துரத்துகையில்

கால்கள் கட்டப்பட்டு விடுகின்றன

நாயொன்று துரத்தும் போது

அசைவற்று நிலைகுத்து நிற்கிறது உடல்

கனவில் குத்துப்படுதல் புரியாமல்

நினைவில் விழித்து அழுகின்றன கண்கள்

கனவில் கூடியோரின் எண்ணிக்கை கேட்டு

பிரசவமான பிள்ளைகள் அழுகின்றனர்

கெட்டவரின் வேஷம் கலைத்து

நல்லவராக விழித்தெழுகிறேன்

வாழாத வாழ்க்கை

வாழக் கூடாத வாழ்க்கை என்றிருக்கிறதா

என்றெதும் இல்லை என்று

கனவுக்குள் தள்ளி

கதவடைத்துப் போகிறார் கடவுள்

கடவுளைக் கொல்லும் வெளியோடு

கனவில் அலைந்து கொண்டிருக்கும்

கொலைகாரர் யாராகவும் இருக்கலாம்

*****