வெயில் மழைப் பேச்சு

வெயில் மழைப் பேச்சு

வீட்டை விட்டுக் கிளம்பும் போது பேசுகிறார்

மாலை வீடு திரும்பியதும் பேசுகிறார்

கேட்டைத் திறந்தால் பேச்சு

மூடினால் பேச்சு

கடையில் காபி சாப்பிட கிளம்பினால் பேச்சு

சாப்பிட்டுத் திரும்பினால் பேச்சு

சீக்கிரம் வாடகையைக் கொடுத்து விட வேண்டும்

என்றுதான் நினைக்கிறேன்

கொடுத்து விட்டால்

அடுத்து இருபது நாட்களுக்குப் பேச்சுக் கொடுக்க மாட்டார்

யாரும் பேசாத வீட்டில்

நான் ஊமையாகவா இருக்க முடியும்

வாடகை வேண்டுமென்றால் பேசட்டும்

பேச்சில் தெரிந்து கொள்ள

எவ்வளவு இருக்கிறது

இன்று வானம் மேகமூட்டத்துடன் காணப்படலாம்

வறண்ட வானிலை நிலவலாம்

பேச்சின் மூலம்தானே தெரிய வருகிறது

*****