திறன்மிகு திறன்பேசியைத் (ஸ்மார்ட் போன்)
திறமையாகத் தேர்வு செய்தல்!
மனைவி
அமைவதெல்லாம் இறைவன் தந்த வரம் என்பதைப் போல திறன்பேசி அமைவதெல்லாம் தொழில்நுட்பம்
தந்த வரம்.
ஒரு
திறன்மிகு திறன்பேசியைத் தேர்வு செய்து விட்டால், வாழ்க்கையில் பல வேலைகள் சுலபமாக
முடிந்து விடும்.
தகவல்
தொடர்பிற்காக வடிவமைக்கப்பட்ட அலைபேசிகள் இன்று சகலமுமாய் வியாபித்துக் கொண்டிருக்கின்றன.
செய்திகளை
அனுப்புவதற்கும், பரிமாறிக் கொள்வதற்கும் தூதுவர்கள், புறாக்கள், கடிதங்கள் என்றிருந்த
நிலையை வேகமாக மாற்றியவை தந்தி. இன்று தந்தி இல்லையென்றாலும் அதன் தாக்கத்தால் உருவான
தினத்தந்தி நாளிதழ் இருக்கிறது.
தந்தியைத்
தொடர்ந்து உருவான தொலைபேசிகள் புரட்சிகரமான மாற்றத்தை உண்டாக்கின. ஒரு வீட்டின் மேட்டிமைத்
தன்மையை அந்த வீட்டில் இருக்கும் தொலைபேசி இருப்பதைக் கொண்டு அளவிட்ட காலமும் ஒன்றுண்டு.
தொலைபேசியை
வேகப்படுத்தியவை பேஜர்கள். இன்று பேஜர்கள் இல்லையென்றாலும் அலைபேசிகளின் குறுஞ்செய்தி
வடிவத்திற்கு அடிகோலியவை அவையே. இன்று குறுஞ்செய்திகளின் இடத்தைப் புலனம், முகநூல்,
எக்ஸ் போன்றவை பிடித்துக் கொண்டாலும் முக்கிய
விவரங்கள், அறிவிப்புகள் அனைத்தும் குறுஞ்செய்தி வாயிலாக அனுப்பப்படுவது நின்று விடவில்லை.
மக்கள் குறுஞ்செய்திகளைப் பயன்படுத்துவது குறைத்து விட்டாலும், பணப்பரிமாற்ற விவரங்கள்
அனைத்துக்கும் வங்கிகள் குறுஞ்செய்திகளையே பயன்படுத்துகின்றன.
கையிலே
எடுத்துச் செல்லும் வகையிலான பித்தான் கைபேசிகள் தொலைபேசிகளின் பயன்பாட்டையே மறுபரிசீலனை
செய்து விட்டன. பித்தான் கைபேசிகளின் காலத்தில் எந்த நிறுவன கைபேசியை வாங்குவது என்று
கொஞ்சம் கூட யோசிக்காமல் நோக்கியாவை வாங்க அலைமோதிய மாபெரும் மக்கள் கூட்டம் இருந்தது.
கையில்
இருந்த கைபேசிகள் திறன்பேசிகளாய் வடிவெடுத்த போது அந்த இடத்தை சாம்சங் பிடித்துக் கொண்டது.
விலை
மலிவிலும் தரத்திலும் சாம்சங் ஒரு புரட்சியையே செய்தது. சீன திறன்பேசிகள் இந்திய சந்தையில்
ஊடுருவிய போது சாம்சங்கின் இடத்தை விவோவும், ஆப்போவும் பிடிக்க முயன்றாலும் இன்றும்
சாம்சங்கிற்கு தனித்த இடம் இருக்கிறது.
இணையத்தைத்
திறந்தால், திறன்பேசி தயாரிக்கும் நிறுவனங்களின் எண்ணிக்கையை எண்ணிச் சொல்லி விட முடியாது.
நாளுக்கொரு நிறுவனம் உருவாகிக் கொண்டிருக்கிறது என்றால் ஒன்றல்ல, அது இரண்டோ, மூன்றோ
கூட இருக்கலாம் என்று நீங்கள் புள்ளி விவரங்களை நீட்டக் கூடும். நிலைமை அப்படி இருக்கிறது.
தேர்வு
செய்யும் போது ஒரு சில மாதிரிகள் மட்டுமே இருக்கும் போது ஏற்படும் சிரமம் ஏகப்பட்ட
மாதிரிகள் இருக்கும் போது ஏற்படும். ஒரு சில மாதிரிகளில் பிடித்தது இல்லாமல் போகலாம்.
ஏகப்பட்ட மாதிரிகளில் எது பிடித்தது என்பதைத் தேர்வு செய்வது கடினமாகப் போகலாம்.
இன்றைய
காலகட்டம் அப்படித்தான் இருக்கிறது, ஏகப்பட்ட நிறுவனங்கள், ஏகப்பட்ட திறன்பேசி மாதிரிகள்
என்று. இவற்றுள் ஒன்றைப் பிடித்த மாதிரி தேர்வு செய்வதும், தேர்வு செய்த அத்திறன்பேசி
நம் எதிர்பார்ப்புகளை நிறைவு செய்வதும் முக்கியம்.
எப்படிப்பட்ட
திறன்பேசியைத் தேர்வு செய்ய வேண்டும்?
அதற்குத்
தேவையான தொழில்நுட்ப அறிவு என்னென்ன?
இவ்விரு
கேள்விகளுக்கும் அவ்வளவு சுலபத்தில் விடை கண்டு விட முடியாது.
திறன்பேசியைப்
பொருத்த வரையில் முதலில் நாம் எந்த விலையில் வாங்கப் போகிறோம் என்பதைத் தீர்மானித்துக்
கொண்டுதான் வாங்குவதில் இறங்குவோம்.
அந்த
விலையை அப்படியே இணையத்தில் தட்டச்சு செய்து தேடலாம். இணைய ஏகப்பட்ட திறன்பேசிகளை அள்ளிக்
கொண்டு வந்து கொட்டி விடும். இனி நம் வேலை தேர்ந்தெடுக்க வேண்டியதுதான்.
நம்முடைய
தேவைகள், எதிர்பார்ப்புகள் என்ன என்பதைத் தீர்மானித்துக் கொண்டு அதற்கேற்ப திறன்பேசிகளைத்
தேர்வு செய்ய வேண்டும்.
சாதாரணமாகப்
பேசுவதற்கும், புலனம், முகநூல் போன்றவற்றைப் பயன்படுத்துவதற்கும் சுமாரான திறன்பேசிகளே
போதுமானவை.
அதிக
அளவில் செயலிகளைப் (ஆப்கள்) பயன்படுத்துவோருக்கு நடுத்தர நிலையிலான திறன்பேசிகள் போதுமானவை.
விளையாட்டுகள்,
காணொளி தயாரிப்புகள் போன்றவற்றிற்கு உயர்நிலை திறன்பேசிகள் தேவை.
திறன்பேசிகளின்
விலை அவற்றின் தற்காலிக நினைவுத் திறன் (ரேம்) மற்றும் அவற்றின் நினைவக சேமிப்புப்
பகுதி (ஸ்டோரேஜ்) அளவைப் பொருத்து மாறுபடுகிறது. தவிரவும் அதிக விலை கொடுத்து வாங்குவோருக்கு
ஏற்பவும் விலை நிர்ணயம் செய்யப்பட்ட விலை உயர்ந்த திறன்பேசிகளும் உள்ளன. ஆப்பிள் மற்றும்
சாம்சங்கின் எஸ் தொடர் மாதிரிகள் (S Series) போன்றவை. அலைபேசிகளில் பயன்படுத்தப்படும்
செயல்திறன் நுட்ப சாதனம் (பிராசசர்) பொருத்தும் விலை மாறுபாடு இருக்கும்.
இப்போது
நமக்குச் சில கேள்விகள் எழக்கூடும். தற்காலத்தில் நாம் பயன்படுத்தும் திறன்பேசிகளுக்கு
எவ்வளவு தற்காலிக நினைவுத் திறன் (ரேம்) மற்றும் நினைவக சேமிப்புப் பகுதி (ஸ்டோரேஜ்)
தேவைப்படும்?
இது
காலத்திற்கேற்ப மாறுபடும். ஒரு காலத்தில் ஒரு ஜிபி தற்காலிக நினைவுத் திறன் (ரேம்),
16 ஜிபி நினைவக சேமிப்புப் பகுதி தேவைப்பட்ட நிலை மாறி தற்போது குறைந்தது தற்காலிக
நினைவுப் பகுதி (ரேம்) 6 ஜிபியிலிருந்து 12 ஜிபி வரை தேவைப்படுகிறது.
நினைவக
சேமிப்புப் பகுதியைப் பொருத்த வரையில் 128 ஜிபி முதல் 512 ஜிபி வரைதேவைப்படுகிறது.
சுமாரான
ஒரு திறன்பேசி போதும் என்றாலும் நீங்கள் 6 ஜிபி தற்காலிக நினைவகத் திறன் (ரேம்),
128 ஜிபி நினைவக சேமிப்புத் திறன் கொண்ட திறன்பேசியைத் தேர்வு செய்ய வேண்டியிருக்கும்
இந்த 2025இல்.
நடுத்தரமான
திறன்பேசி உங்களுக்குப் போதும் என்றால் 8 ஜிபி
தற்காலிக நினைவகத் திறன் (ரேம்), 256 ஜிபி நினைவக சேமிப்புத் திறன் கொண்ட திறன்பேசியைத்
தேர்வு செய்ய வேண்டியிருக்கும்.
உயர்தரமான
திறன்பேசி தேவை என்றால் 12 ஜிபி தற்காலிக நினைவகத்
திறன் (ரேம்), 512 ஜிபி நினைவக சேமிப்புத் திறன் கொண்ட திறன்பேசியைத் தேர்வு செய்ய
வேண்டியிருக்கும்.
அடுத்ததாகத்
திறன்பேசிகளில் அமைக்கப்பட்டிருக்கும் செயல்திறன் சாதனம் (பிராசசர்) குறித்துப் பார்க்க
வேண்டும். இதுவே நீங்கள் பயன்படுத்தும் திறன்பேசிகளின் திறனுக்குக் காரணமானவை. பதினைந்தாயிரத்துக்கு
மேல் உள்ள திறன்பேசிகளில் ஒவ்வொரு நிறுவனமும் சிறந்த செயல்திறன் சாதனங்களைப் (பிராசசர்)
பயன்படுத்துகின்றன. திறன்பேசி செயல்திறன் சாதனத்தில் ஸ்மார்ட் டிராகன் தற்போது பலராலும்
கவனிக்கப்படுகிறது.
கூடுதலாக
நீங்கள் வாங்கும் திறன்பேசியை வழங்கும் நிறுவனம் எத்தனை ஆண்டுகளுக்கு மென்பொருள் புதுப்பிப்பு
(சாப்ட்வேர் அப்டேட்) மற்றும் பாதுகாப்பு வசதிகள் புதுப்பிப்பு (செக்யூரிட்டி அப்டேட்)
போன்றவற்றை வழங்குகிறது என்பதையும் பார்த்துக் கொள்ளுங்கள்.
இணைய
வழியிலோ, கடைக்கு நேரிலோ சென்று வாங்கும் போது சலுகை விலை அதிகம் வழங்கப்படுகிறது என்பதற்காக
பழைமையான மென்பொருள் மற்றும் விரைவில் காலாவாதியாக இருக்கும் மாதிரிகளைத் தேர்வு செய்து
விடாதீர்கள்.
எந்த
நிறுவனத்தின் திறன்பேசியை வாங்குவது என்ற கேள்வி எழும் போது, நீங்கள் ஏற்கனவே பயன்படுத்திக்
கொண்டிருக்கும் நிறுவனத்தின் திறன்பேசிகளை வாங்குவது உங்களுக்குப் பயன்படுத்துவதற்கும்
மட்டுமல்லாமல் உங்களுக்கு உணர்வு ரீதியாகவும் ஒத்துப் போகும். அதற்காக நீங்கள் ஒரு
நிறுவனத்தின் திறன்பேசியையே தொடர்ந்து வாங்கிப் பயன்படுத்திக் கொண்டிருக்க வேண்டும்
என்ற கட்டாயமெல்லாம் இல்லை. உங்கள் விருப்பம் போல நீங்கள் விரும்பும் நிறுவனத்தின்
திறன்பேசிகளைத் தேர்வு செய்யலாம். அது உங்களுக்கு வசதியாகவும் உங்கள் உணர்வுகளுக்கும்,
எதிர்பார்ப்புகளுக்கும் ஒத்துப் போக வேண்டும் என்பது முக்கியம்.
ஏற்கனவே
சந்தையில் கோலோச்சிக் கொண்டிருக்கும் நிறுவனங்களை விட புதிய நிறுவனங்கள் அதிக வசதிகள்
கொண்ட திறன்பேசிகளைக் குறைந்த விலையில் தரத் தயாராக இருக்கின்றன. அது போன்ற நிலையில்
அத்திறன்பேசிகளை ஏற்கனவே பயன்படுத்தியவர்களின் அனுபவங்களைப் பெற்ற பிறகு அதை வாங்குவது
குறித்து பரிசீலிப்பது பயன் தரும். அல்லது நீங்கள் இதற்கென யூடியூப் காணொளிகளில் இருக்கும்
அனுபவஸ்தர்களின் கருத்துகளையும் பயன்படுத்திக் கொள்ளலாம்.
நீங்கள்
எந்தத் திறன்பேசி வாங்குவதாக இருந்தாலும் அது குறித்த ஒரு பார்வையையும் தெளிவையும்
தரும் யூடியூப் காணொளிகள் இணையத்தில் கொட்டிக் கிடக்கின்றன. அதை ஒரு முறை பார்த்துவிட்டு,
அதன் பிறகு அத்திறன்பேசியை வாங்குவது குறித்து முடிவெடுக்கலாம்.
அத்துடன்
நீங்கள் வாங்க இருக்கும் அலைபேசியின் விலையை இணையத்திலும் ஒரு முறை சோதித்து வாங்குங்கள்.
சில நேரங்களில் கடைகளில் வாங்குவதை விட இணையத்தில் வாங்குவது குறைவாக இருக்கும். அதே
போல இணையத்தில் வாங்குவதை விட கடைகளில் வாங்கும் போது ஐநூறு வரை விலை குறைவாக இருக்கும்
சந்தர்ப்பங்களும் நேர்வதுண்டு. இணைய வழி, நேரில் சென்று கடை வழி வாங்குவது ஆகிய இரண்டிலும்
விலையைத் தெரிந்து கொண்ட பிறகு எம்முறையில் வாங்குவது என்பது குறித்து முடிவெடுங்கள்.
சிறந்த
திறன்பேசியைத் தேர்ந்தெடுத்துச் சிறப்பாகப் பயன்படுத்தி முன்னேற வாழ்த்துகள்!
*****
