காகிதத்தின் அதிர்ஷ்டம்

காகிதத்தின் அதிர்ஷ்டம்

எல்லாருக்கும் ஆசை

விதவிதமான ஆசைகள்

வேகமாகச் சம்பாதிக்க வேண்டும்

விரைவில் பணக்காரராக வேண்டும்

காரில் செல்ல வேண்டும்

பிறகு விமானத்தில் செல்ல வேண்டும்

விண்வெளிக்குச் சுற்றுலா செல்ல வேண்டும்

எல்லாருக்கும் பணத்தின் மீது ஆசை

பணத்திற்கு யார் மீதும் ஆசையில்லை

பணத்திற்கு மட்டும் பணத்தின் மீது ஆசையில்லை

ஆசையிருந்தால் கறையான் அரிக்கும் பொழுதில்

கண்டு கொள்ளாமல் இருந்திருக்குமா

கிழிபட்ட போது கதறாமல் இருந்திருக்குமா

செல்லாது என அறிவித்த போது

சும்மா இருந்திருக்குமா

காலம் நேரம் லக்னம் ராசி பார்க்காமல்

கைமாறிக் கொண்டே இருக்குமா

பணமாக அச்சாகும் காகிதத்திற்கு அன்றோ

பணமாகும் அதிர்ஷ்டம் இருக்கிறது

*****

அவர் இவர் எவரும் செய்ய வல்ல ஒன்று

அவர் இவர் எவரும் செய்ய வல்ல ஒன்று

தெரியாததைக் கூகுளில் தேடுகிறோம்

தெரிந்து கொள்ள யூடியூப் பார்க்கிறோம்

நினைத்ததைப் பேஸ்புக்கில் ஷேர் செய்கிறோம்

நிகழ்த்துவதை இன்ஸ்டாவில் பதிவிடுகிறோம்

எப்போதும் பரபரப்பாக இருக்கிறோம்

யார் மற்றவர்களிடம் பேசுகிறோம்

மனதுக்குள் வாய்கிழிய கத்துகிறோம்

எல்லாரும் எல்லாருடனும் அன்பாக இருக்க வேண்டும்

உலகம் அமைதி வழியில் செல்ல வேண்டும்

எல்லாரும் அன்பாக இருந்துவிடுவார்களா

உலகம் அமைதி வழியில் சென்று விடுமா

மாறி நடக்கும் போதும் மாறாமல் இருக்க வேண்டும்

யாரும் அன்பாக இல்லாத போதும்

அன்பாக இருக்க வேண்டும்

உலகம் அமைதியாக இல்லாத போதும்

அமைதியாக இருக்க வேண்டும்

அது ஒன்றே

நீங்கள்

நான்

அவர்

இவர்

ஒவ்வொருவரும்

எவரும் செய்ய வல்லது

*****

1008 பிரச்சனைகளின் முகவரிகள்

1008 பிரச்சனைகளின் முகவரிகள்

பிரச்சனை என்பது இருக்கும்

பிரச்சனை இல்லாமல் இருக்க வேண்டும்

என்று நினைப்பதும் பிரச்சனைதான்

எந்தப் பிரச்சனை இல்லாமல் இருக்கும்

எல்லாவித பிரச்சனைகளும் இருக்கும்

எந்த விதமான பிரச்சனையும் இருக்கக் கூடாது

என்று நினைப்பதோ வேண்டுவதோ மாபெரும் பிரச்சனை

எல்லாரையும் போல நினைக்கலாம்

இணக்கம் இல்லை என்பது பிரச்சனை

இணக்கம் வேண்டும் என்று நினைப்பதும் பிரச்சனைதான்

அதிலேயே யோசித்துக் கொண்டு

அதிலேயே இருந்து விட முடியாது

பிரச்சனைகளை எதிர்கொண்டு

கடந்து கொண்டு இருக்கலாம்

அல்லது கண்டு கொள்ளாமல் இருக்கலாம்

பிரச்சனை குறித்த பிரார்த்தனைகளோ

தீர்ந்து விட வேண்டும் என்ற நம்பிக்கைகளோ

காந்த சக்தி போல பிரச்சனைகளை ஈர்த்து விடுகின்றன

எப்போதோ சந்திக்கின்ற வழிபோக்கர்களைப் போல

எதிர்கொண்டு செல்பவர்களுக்கு

பிரச்சனைகளின் விலாசங்கள் மனதில் தங்குவதில்லை

*****

பாதைகளின் சாசுவதங்கள்

பாதைகளின் சாசுவதங்கள்

யாரிடம் எதை நிறுவ

யாரிடம் எதைப் புரிந்து கொள்ளச் செய்ய

இக்கட்டான நேரங்களை எதிர்கொள்ள

ஆற்றுப்படுத்துவதா அறிவுரை சொல்வதா

கருத்துக் கூறுவதா விளக்கம் கேட்பதா

அமைதியாகக் கூறுவதைக் கேட்கின்ற வழியில்

பாதைகள் பயணிக்கத் தொடங்குகின்றன

பேசாமல் இருப்பது பேசுவதை விட

எவ்வளவு வலிமையாக இருக்கிறது

கடினமான சூழ்நிலைகளை எதிர்கொள்வதைப் போல

எதிர்கொள்ளாமல் இருப்பது சிறந்த வழியாகிறது

தவறாகப் புரிந்து கொள்வதை

யார் என்ன செய்ய முடியும்

யார் தடுத்து நிறுத்த முடியும்

சரியாகப் புரிந்து கொள்ளுங்கள் என்று

எப்படி நிர்ப்பந்தம் செய்ய முடியும்

ஒவ்வொரு புரிதலும் அதற்கான

பிரத்யேகப் பாதைகளில் பயணித்துக் கொண்டிருக்கின்றன

பாதைகளை அடைக்க நினைப்பது தற்காலிகமானது

பயணிக்க விடுவதே சாசுவதமானது

*****

எழுதப்பட்ட விதிக்குள் எழுதப்படாத விதி

எழுதப்பட்ட விதிக்குள் எழுதப்படாத விதி

ஆசைகள் எங்கெங்கோ கொண்டு போய் நிறுத்துகின்றன

கத்தியின் கூர் முனையின் மேல் இதயத்தை

செஞ்சுடரின் மேல் வெண்பஞ்சை

யாரையும் யாரும் மாற்றுவது ரொம்பவே கஷ்டமானது

மாற்றத்தை உணர்ந்து அவரவர் மாறிக் கொள்வது எளிதானது

அதுவரை அவர்கள் அப்படியே இருப்பது உசிதமானது

உண்மையான அன்பு

ஒருவரின் ஆசைக்குக் குறுக்கே நிற்காது

எப்படியோ ஒவ்வொன்றும் நடந்து கொண்டுதான் இருக்கின்றது

எதற்காகவும் யாரையும் குறை கூற முடியாது

கனமாகிப் போகின்ற இதயம்

லேசாகத் துடித்து வெடித்துச் சிதறுவது இயற்கையானது

என்றோ ஒரு நாள் வெடிப்பதற்காக

எரிமலையை யார் என்ன செய்ய முடியும்

தலைக்கு மேல் தொங்கும் கத்திகள் போல்

தற்செயல்கள் எப்போது வேண்டுமானாலும் அறுந்து விழும்

விபத்துகள் எப்போதோ நேரும் என்பதற்காகப்

பயணிக்காமல் இருக்க முடியுமா

வாழ்க்கைப் பயணிகள் மனிதர்கள் என்பது எழுதப்பட்ட விதி

பயணித்துக் கொண்டிருக்க வேண்டும்

என்பது எழுதப்படாத விதி

*****

 

நீரில் வரையும் காற்றின் ஓவியம்

நீரில் வரையும் காற்றின் ஓவியம்

வாழ்ந்து முடித்தப் பிறகு

அர்த்தம் கொடுக்கத் தோன்றுகிறது

நோக்கம் கற்பிக்க ஆசை பிறக்கிறது

உலகிற்கு ஏதோ சொல்ல வேண்டுமென்ற

பரிதவிப்பு தோன்றி விடுகிறது

சொல்லாமல் கொள்ளாமல் கிளம்பி விட்ட

விருந்தாளியைப் போலாகி விட்ட வாழ்க்கையில்

வாழ்தலே அர்த்தம்

வாழ்தலே நோக்கம்

வாழ்தலே செய்தி

அதற்கு மேல் ஒன்றுமில்லை என்று

உரக்க கத்தத் தோன்றுகிறது

அதைத்தானே செய்து கொண்டிருக்கிறோம் என்று

காற்றில் அசைகின்றன மரங்கள்

வானில் பறக்கின்ற பறவைகள்

நிலத்தில் ஊர்கின்றன புழுக்கள்

நீரில் நீந்துகின்றன மீன்கள்

முகத்தில் வந்து அப்புகின்றது தூசி

சொல்வதற்கு ஏதுமில்லை என்று கைவிரிக்கையில்

கேட்கத் தொடங்குகிறது ஓலம்

*****

நான்கும் கலந்த வாழ்க்கை

நான்கும் கலந்த வாழ்க்கை

இன்பமோ துன்பமோ

இரண்டும் கடக்கத்தான்

இன்பத்திலே இருந்து விடவோ

துன்பத்திலே தோய்ந்து விடவோ

யாரால் முடியும்

மீள்வதற்கு காலமாகிறது என்பதற்காக

மீளவே முடியாது என்பதா என்ன

கஷ்டம் நஷ்டம் வருத்தம் துயரம் இல்லாமல்

எப்படி இருக்கும் வாழ்க்கை

எல்லாவற்றையும் எப்படி எதிர்கொள்கிறோம்

என்பது அன்றோ வாழ்க்கை

வரமோ சாபமோ

இரண்டையும் எதிர்கொள்ளத்தான் போகிறோம்

வரத்தை மட்டும் எதிர்கொள்ள நினைப்பதன்றோ

மனதின் சாபம்

உண்மையின் அடுத்தப் பக்கத்தில்

சாபத்தை எதிர்கொள்வது வரம் என்று எழுதப்பட்டிருக்கிறது

நல்லது கெட்டது

நியாயம் அநியாயம்

நான்கும் கலந்தது வாழ்க்கை

*****

விலக்கிக் கொண்டோடும் அசாத்திய நதி

விலக்கிக் கொண்டோடும் அசாத்திய நதி

காலப் பெருவெளியில் தனக்கான நேரத்தைச்

சாவகாசமாக எடுத்துக் கொண்டு

சீரமைத்துக் கொள்ளப் பார்க்கிறார் பைத்தியக்காரர்

எப்படியோ காரியம் ஆக வேண்டும் என்று

நெருக்கடிகளைக் கொடுத்துப் பார்க்கிறார் காரியக்காரர்

எதிலாவது எப்படியாவது பெயர் வாங்க வேண்டும் என்று

முனைகிறார் உதவாக்கரை என்று பெயரெடுத்தவர்

அடுத்த சாதனைக்குத் தயாராக வேண்டும் என்று

மனச்சோர்வுக்குள் முடங்காமல் இருக்க போராடுகிறார்

சாதனையாளர் என்ற அடைமொழிக்கு நேர்ந்து விட்டவர்

யார் எப்படிப்பட்டவராக இருந்தாலும்

யார்தான் அபத்தமான முடிவெடுப்பதைத் தவிர்க்க முடியும்

பலமாக இருப்பதாக நினைக்க முடியாத வகையில்

பலவீனங்களும் இருக்கின்றன

எல்லாவற்றையும் எதிர்கொண்டாக வேண்டும் என்பதோடு

சில நேரங்களும் அடிபடவும் வேண்டியிருக்கும்

ஒவ்வொருத்தருக்கும் ஒவ்வொன்று

எது சரி எது தவறு எல்லாம் ஏதோ ஒன்று

எது எப்படியோ

ஒருவரின் ஆசை நிறைவேறும்

இன்னொருவரின் ஆசை நிராசையாகும்

ஆசைப்படாமல் இருக்க முடியாது என்பதை விட

ஆசையைத் துறந்து விட்டு ஓடி விட முடியாது

இதை செய்து விட்டால் மாறி விடும் என்று நினைப்பதோ

செய்யாமல் விட்டால் மாறாமல் இருந்து விடும் என்று நினைப்பதோ

நினைப்புகளுக்குள் அடங்குவதா சாத்தியங்கள்

நடந்தேறிய காரியங்களுக்காக நன்றி சொல்லவும் நேரிடும்

கண்ணீர் விடவும் வேண்டி வரும் என்பதைப் புரிவதற்குள்

எல்லாம் முடிவுக்கு வந்து அடுத்தது ஆரம்பமாகி விடும்

யாருடைய ஆசைக்கேற்ப யாருடைய காரியங்கள்

எப்படி நிகழும் என்பதோ நிகழாது என்பதோ

கணிப்பிற்குள் அடங்காத சூத்திரங்கள்

*****

வலியின் சுக ராகம்

வலியின் சுக ராகம்

உங்கள் முதல் சந்தோசம்

உங்கள் முதல் துயரமாக மாறினால்

எதைப் பார்த்தாலும் வலி ஏற்படும்

எல்லாவற்றையும் கதையாகக் கேட்டே

தெரிந்து கொள்ள முடியும் என்று நினைக்கிறீர்களா

கொஞ்சம் வாழ்ந்துப் பார்க்கும் போதுதான் வலிப்பது உரைக்கும்

நீங்களே உணரும் போதுதான் வலியின் ஆழம் புரியும்

அதன் பிறகு அவை போன்றவற்றைப் பார்க்கும் போதெல்லாம் வலிக்கும்

ஒவ்வொரு சந்திப்பின் போதும் நிறைய பேசத் தொடங்குவீர்கள்

நான் கேட்டுக் கொண்டே இருப்பேன்

ஒன்று உங்களுக்குப் புரியுமா

அன்பாக இருப்பது அன்பாக இருப்பதற்குத்தான்

அன்பால் எதையும் சாதிப்பதற்கா என்ன

ஆகவே நாளையை நாளைப் பார்ப்போம்

இன்று இந்த வலியின் சுக ராகத்தைக் கேட்போம்

அதை மீட்டும் அன்புக்குரியவரின் ஆன்மா அதில் ஒளிந்திருக்கிறது

*****

கால கிறுக்கல்கள்

கால கிறுக்கல்கள்

இந்த உலகின் மோசமான மொக்கைப் பிறவி நீயே

ஏனோ என் தூக்கத்தைக் கெடுக்கிறாய்

உறக்க மாத்திரைகளைத் தோற்கடித்து

எதுவுமே நடக்காதது போல

எத்தனை நாட்கள் இப்படி இருக்க முடியும்

சில நாட்களில் முன்னுக்குப் பின் முரணாக

அதீத தூக்கத்தை எதிர்கொள்கிறேன்

வேறு சில நாட்களில் அதீத அழுகையால் நனைந்து போகிறேன்

மனதை மறைக்கும் போதன்றோ சந்தேகப் படுகிறார்கள்

எனக்கோ பாதி சம்பவங்கள் நினைவில்லை

பாதி சம்பவங்களை மறக்க முடியவில்லை

மறப்பதைப் பற்றி நினைப்பதைப் பற்றி கவலையில்லை

வாழ்க்கையை ஓர் ஒழுங்கில் வாழ முடியாது

கொஞ்ச காலத்தை மெல்லமாய் நகர்த்தும் போது

ஒழுங்கற்ற ஒழுங்குக்குள் வந்து விடுகிறேன்

இப்போது கொஞ்சம் பொறாமை கொஞ்சம் பரிதாபம்

இரண்டும் இருக்கிறது உன் மேல்

ஒருவேளை எல்லாவற்றையும் நான் மறந்தால் கவலைப்படக் கூடாது

என்பதற்காகத்தான் இப்படி எழுதிக் கொண்டிருக்கிறேன்

நீ இந்த அபத்தங்களை ஏற்றுக் கொள்ளத்தான் வேண்டும்

அதில்தான் நம் அன்பு இருக்கிறது

ஒன்றைப் புரிந்து கொள்

பகுத்தாராய்வான முடிவுகளை எடுக்க முடியாது

காலம் அதற்கு அனுமதிக்காது

*****

எந்தக் கணத்திலும் ஏதுமில்லை

எந்தக் கணத்திலும் ஏதுமில்லை

இந்தக் கணத்தை மறக்க முடியாததாகச் செய்யப் போகிறீர்களா

ஏன் அப்படி செய்ய வேண்டும்

அது எப்படியோ போகட்டும்

ஏன் இந்தக் கணம் எப்படி இருந்தால் என்ன

அது ஒரு கணம்

அது இஷ்டப்படியோ அல்லது என் இஷ்டப்படியோ

இருந்து விட்டுப் போனால் என்ன

இந்தக் கணத்தையும் என்னையும்

தயவுசெய்து தொடர்பு படுத்தாதீர்கள்

பரிசுத்தங்கள் அசுத்தத்திற்கான வழி

கட்டாயங்கள் மன அழுத்தத்திற்கான பாதை

கானகத்தில் சுத்தமேது அசுத்தமேது எல்லாம் உரங்கள்

காட்டுப்புலிக்கு நீங்கள் இரையாகும் கணத்தில்

காட்டுப்புலிக்கு இரையாகப் போகும்

இன்னொருவர் பிறந்து விடுகிறார்

*****

மன கோபுரங்கள்

மன கோபுரங்கள்

அசலான கேள்வியை எதிர்கொள்ளும் போது

உடைந்து போவீர்கள்

உங்கள் அழுகை உங்கள் பலவீனத்தைக் காட்டலாம்

அநேகமாக உறைந்து போதலும் நடக்கலாம்

உங்கள் மனம் வெடித்துச் சிதறியும் போகலாம்

துண்டு துண்டாகக் கிடக்கும் இதயத்தை

நீங்கள் பொறுக்கிக் கொண்டிருக்கலாம்

எதுவும் நடக்காது என்றும் சொல்ல முடியாது

எது நடக்கும் என்றும் சொல்ல முடியாது

ஒவ்வொன்றும் நடக்கும் போது

நீங்கள் ஒவ்வொரு மாதிரியாக வினையாற்றுவீர்கள்

எல்லா உதவியும் கிடைக்கும் போதும் தோற்றுப் போவீர்கள்

புத்திசாலித்தனமாகச் சிந்தித்துச் செயல்படும் போது

மிகப்பெரும் சறுக்கலை எதிர்கொள்வீர்கள்

என்ன செய்ய முடியும் உங்களால்

எல்லாவற்றையும் எதிர்கொள்வதைத் தவிர

ஒரு சிலவற்றிற்குக் காரணத்தைக் கண்டுபிடித்து விட்டதற்காக

எல்லாவற்றுக்கும் காரணத்தைத் தேடாதீர்கள்

முடங்குவதும் திமிரி எழுவதும் மாறி மாறி நடக்கும்

எல்லாம் துடைத்தெறியப்படும் போது

நீங்கள் புதிதாக முளைத்தெழுவீர்கள்

நம்பிக்கையோ அவநம்பிக்கையோ விசயமல்ல

வெறுமனே இருக்கையில் வெற்றிடத்தில்

பறவையைப் போல சிறகடித்துக் கொண்டிருப்பீர்கள்

எதில் மோதி விழுகிறீர்களோ

அது நீங்கள் எழுப்பிய மனகோபுரங்கள்

*****

நாம் ஏன் நம் பிரச்சனைகளுக்கு நன்றி சொல்லக் கூடாது

நாம் ஏன் நம் பிரச்சனைகளுக்கு நன்றி சொல்லக் கூடாது

ஒரு கட்ட பிரச்சனை முடிவது

அடுத்த கட்ட பிரச்சனையை உண்டாக்கிறது

இதை எப்படி சரி செய்யப் போகிறோம்

சிலரிடம் சொல்லி வைத்திருக்கிறோம் இல்லையா

ஆனால் இது பெரிய பிரச்சனை இல்லை

தீர்வு வரா விட்டாலும் பரவாயில்லை

இது சம்பந்தமாக யாரிடமும் பேசியிருக்கக் கூடாது

அவர்கள் ஏகப்பட்ட திருத்தங்களைச் சொல்கிறார்கள்

 சட்ட விதிகளை நீட்டுகிறார்கள்

அவ்வளவையும் மிகச் சரியாக நிறைவேற்றுவது என்றால்

சில நேரங்களில் நீங்கள் தற்கொலைக்கும் முயற்சிக்கலாம்

ஏன் அந்தப் பிரச்சனை இருக்கக் கூடாது

அந்தப் பிரச்சனையோடு நாம் இருக்கக் கூடாதா

நம்மோடு அந்தப் பிரச்சனை இருக்கக் கூடாதா

பிரச்சனைகளைத் தீர்ப்பதினும் பிரச்சனைகளோடு இருந்து விடுவது

நீங்கள் உயிர் வாழ்வதற்கு உத்தமான வழி

நம்மை உயிர் வாழ வைத்துக் கொண்டிருக்கும்

பிரச்சனைகளுக்கு இன்றாவது நன்றி சொல்லுங்கள்

*****

வீடுபேறு

வீடுபேறு

அனுமதி பெற்று வீடு கட்டுவது என்றால்

குளவி அனுமதி பெற்றா கூட்டைக் கட்டுகிறது

பாம்பு அனுமதி பெற்றா புற்றைக் கட்டுகிறது

தேனீக்கள் யாருடைய அனுமதியைக் கேட்கின்றன

தூக்கணாங்குருவி யாரைக் கேட்கிறது

முன் அனுமதி பெறாமல் வீட்டைக் கட்டியது குற்றமாகி விட்டது

குளவிக் கூட்டை பாம்புப் புற்றை தேன் கூட்டை குருவிக் கூட்டை

கலைத்தால் கொட்ட வரலாம் கொத்த வரலாம்

மனிதன் கோபம் கொள்ளலாம்

கோபித்துக் கொண்டு மறுகூட்டைக் கட்டாமலா போய் விடுகின்றன

மறுவீட்டைக் கட்டித்தான் ஆக வேண்டும்

இந்த முறை முன் அனுமதி வாங்கி விட வேண்டும்

அதற்கான மன உளைச்சல்களைக்

கால் அலைச்சல்களைத் தாங்கித்தான் ஆக வேண்டும்

இந்தக் குடைசல்கள் வேண்டாம் என்றால்

வாடகை வீட்டில் வாழ்ந்து முடித்துக் கொள்ள வேண்டும்

வாடகை வீடு கட்டுபவர்கள் ஒரே நேரத்தில்

ஒன்பது வீடுகளுக்கு முன் அனுமதி பெறத் தெரிந்தவர்கள்

*****