அப்பாவின் கைபேசி

அப்பாவின் கைபேசி

பழைய மாடல் நோக்கியா போன்தான்

அப்பாவுக்குப் பிடித்திருக்கிறது

அப்பாவுக்குப் பிடிக்கிறது என்பதற்காக

எத்தனை முறை ரிப்பேர் செய்வது என்று

கடைக்காரன் அலுத்துக் கொள்கிறான்

வேண்டுமானால் அப்பாவிடம் பேசிப் பார்க்கவா என்கிறான்

கிரகம் அப்படியென்றால் தடுப்பதற்கு நான் யார்

நீயாச்சு அப்பாவாச்சு என்றேன்

கடைக்காரன் பேசிப் பார்த்திருக்கிறான்

அப்பா ஒரே போடாகப் போட்டிருக்கிறார்

போடு என்றால் அந்தப் போடில்லை

நிஜமாகவேப் போட்டிருக்கிறார்

நோக்கியா போன் அப்படியே இருந்திருக்கிறது

கடைக்காரனின் டச் போன் சுக்கு நூறாகியிருக்கிறது

மறுமுறை கடைக்காரனைப் பார்த்த போது

அப்பாவிடம் பேச வேண்டாம் என்று

நீங்கள் தடுத்திருக்கலாம் சார் என்றான்

நான்தான் சொன்னேனே

கிரகம் அப்படியென்றால் தடுப்பதற்கு நான் யார் என்றேன்

நீங்கள் சொன்னால் கேட்க வேண்டும் என்றான்

நல்லதாகப் போயிற்று

சீக்கிரம் போனை ரிப்பேர் செய்து கொடுத்து விடு என்றேன்

அப்பாவை வரச் சொல்லாமல்

நீங்களே சிரமம் பார்க்காமல் வந்து வாங்கிக் கொள்ளுங்கள் என்றான்

அதற்கென்ன வாங்கிக் கொண்டால் போயிற்று

*****