பாத்தியப்படாதவர்கள்

பாத்தியப்படாதவர்கள்

சொத்து பிரிப்பதில் தாத்தா கில்லாடி

அவரே பிறந்த ஊரை விட்டு

சொத்தைப் பிரித்துக் கொண்டு வந்தவர்தான் என்று

ஆளாளுக்கு அவர் காதில் படாமல் சொல்வார்கள்

நான்கு பிள்ளைகள் பிறந்த போதே

மூத்தவனுக்கு ரெண்டாமவனுக்கு

மூன்றாவமவனுக்கு நான்காமவனுக்கு என்று

ஆளாளுக்கு இடம் வாங்கி மச்சு வீடு கட்டி

சாசனம் செய்து வைத்து விட்டார்

சாவதற்கு நாற்பது ஆண்டுகளுக்கு முன்பே

செத்த பின்பு எந்தப் பிரச்சனையும் வரக் கூடாதென்று

நான்கு பிள்ளைகளும் நான்கு திசையில்

நான்கு தேசத்திற்கு வேலைக்குப் போனதில்

பிள்ளைகளுக்குக் கட்டிய வீட்டில்

வாடகைக்கு வந்தவர்கள் அனுபவம் செய்தார்கள்

தாத்தா செத்து கருமாதி முடிவதற்குள்

நான்கு பிள்ளைகளும் நான்கு வீடுகளையும்

வாடகைக்கு இருந்தவர்களுக்கே விற்று விட்டு

நான்கு தேசங்களுக்கும் பறந்து போனார்கள்

முப்பதுக்கு படைத்த நாளன்று

நான்கு பிள்ளைகளின் நான்கு வீடுகளிலும்

எந்த வீட்டிலும் எந்த பிள்ளையும் இல்லாததைப் பார்த்து

தாத்த என்ன நினைத்திருப்பாரோ

*****