கால இயந்திரத்திலேறி பாராட்டி விட்டு வருவேன்

கால இயந்திரத்திலேறி பாராட்டி விட்டு வருவேன்

முகத்தைப் பார்த்தால் பெயரும்

பெயரை நினைத்தால்முகமும்

மறந்து போகும் வியாதி எனக்கு

வாய்ஸ் காலில் பெயரைச் சொல்பவர்கள்

வீடியோ காலில் வந்து முகத்தையும்

வீடியோ காலில் முகம் காட்டுபவர்கள்

அப்படியே பெயரைச் சொன்னாலும் சரி

அல்லது வாய்ஸ் காலில் வந்து

பெயரைச் சொன்னாலும் சரி

முப்பது ஆண்டுகளுக்கு முன்பு

பெயரை எழுதி

பாஸ்போர்ட் சைஸ் போட்டோவையும் ஒட்டி

பொங்கல் வாழ்த்து அனுப்பியிருக்கிறான் நண்பன்

என் வியாதியைப் புரிந்தவனைப் போல

சமீபத்தில் இந்த உண்மையைச் சொன்ன போது

அந்தப் போட்டோவில் இருப்பவனா இவன்

இவனா அந்தப் போட்டோவில் இருக்கிறான் என்று

மூளையின் இரண்டு பக்கமும் உடுக்கையடி

சந்தேகத்தைப் புரிந்து கொண்ட நண்பன்

ஆதார் கார்டிலிருக்கும் புகைப்படத்தைக் காட்டுகிறான்

அடடே பலே பலே அந்தக் காலத்துப்

புகைப்படக்காரர்கள் புகைப்படக்காரர்கள்தான்

எதிர்கால இயந்திரத்தில் ஏறி எப்படித்தான்

அந்தப் புகைப்படக்காரன்

ஆதார் கார்டில் அமையப் போவதைப் போல

அந்தக் காலத்திலேயே அப்படியொரு படம் எடுத்தானோ

எண்ணி எண்ணி வியக்கிறேன்

கால இயந்திரம் இருந்தால் ஏறிச் சென்று

அவன் கைவிரல்கள் பத்திற்கும்

அப்போதிருந்த தங்க விலையில்

மோதிரங்கள் வாங்கிப் போட்டு விட்டு

இந்தக் காலத்தில் நல்ல விலைக்கு விற்கலாம் என்று

இருபது முப்பது மோதிரங்கள் வாங்கி வருவேன்

*****