மீளும் அதிர்ஷ்டம்

மீளும் அதிர்ஷ்டம்

பேருந்து நடத்துநரின் கையிலிருந்து

ஒரு ரூபாய் சில்லரைக்கு

இரண்டு ரூபாய் தவறி வந்து விடும் போது

அந்த நாளின் அதிர்ஷ்டத்தைக் குழைப்பதைப் போல

ஐந்து ரூபாய் சில்லரைக்குப் பதில்

ஒரு சாக்லேட்டை எடுத்து நீட்டி விடுகிறார்

கடைக்காரர் ஒருவர்

சட்டைப்பையில் நெடுநேரம்

சிறைபட்டிருக்கும் சாக்லேட்டை

சிறுமி ஒருத்தியைப் பார்க்கையில்

எடுத்து நீட்டும் போது

தொலைந்துப் போன

அற்றை நாளின் அதிர்ஷ்டம் மீள்வதென

தேவ கணங்களின் புன்னகையை

நீட்டி விட்டுப் போகிறாள் தேவதையைப் போல

*****