புதிய வருகையாளர்கள்

புதிய வருகையாளர்கள்

எதாவது புதிய செய்தி வருமா என்று பார்க்கிறேன்

எதுவும் எனக்கென வரவில்லை

பார்வேர்டு செய்யப்படும் வாட்ஸ்ஆப் செய்திகள் வருவதும் நின்று விட்டது

எதாவது எனக்கு வந்தாக வேண்டும் என்று

ஸிவிக்கியில் அமேசனில் ஆர்டர் போடுகிறேன்

சில மணி நேரங்களில் வாசல் கதவைத் தட்டுகிறது ஸ்விக்கி

இரண்டு நாட்களில் அமேசான் வீடு தேடி வருகிறது

தனிமையில் தவிக்கும் மனதுக்குத் துணைக்கு

ஆள் சேர்க்க வேண்டும் என்ற தவிப்பில்

சுற்றும் முற்றும் பார்க்கிறேன்

தானாக வந்து அமரும் குருவி

கதவைத் தள்ளி வரும் காற்று

இலையை உதிர்த்து தீண்டிப் போகும் மரம்

கீரை வேண்டுமா என்று கேட்டு வரும் பாட்டி

பஞ்சு மிட்டாய் விற்க வரும் இளைஞன்

பழைய இரும்பு பேப்பர் கேட்டு வரும் வியாபாரி

கேஸ் சிலிண்டர் போட வரும் வண்டி

எல்லாரையும் சிநேகமாக்கிக் கொண்ட பிறகு

ஒரு நாள் கோதுமை நிறப் பாம்பொன்று

எட்டிப் பார்த்து விட்டு விலகிச் செல்கிறது

*****